Valayamkulam
ഇഷ്ടങ്ങൾക്ക് കുടപിടിച്ച സ്വന്തം ഉമ്മ, ആ ഉമ്മയിലൂടെ ആയിഷാ റാവുത്തറെ കണ്ടെത്തിയ അബു വളയംകുളം
സങ്കടങ്ങൾക്കും നിസ്സഹായതയ്ക്കും ഏകാന്തതക്കുമിടയിലെ കടൽ ദൂരം കടക്കാൻ ദസ്ബിയിൽ-ജപമാല- അഭയം തേടിയ ആയിഷ റാവുത്തർ. കാലമേൽപ്പിച്ച വിശ്വാസദാർഢ്യത്തിന്റെ തിളക്കമുള്ള ദസ്ബിയുമായി ആയിഷ റാവുത്തർ എന്ന നിഷ്കളങ്കയായ ഉമ്മ തിയറ്ററുകൾ കീഴടക്കുമ്പോൾ അബു വളയംകുളത്തിന് ഓർമകളിൽ ഉമ്മ കടൽകാറ്റ് പോലെ തലോടിയെത്തുന്നുണ്ട്. പറക്കമെത്തുംമുമ്പേ ബാപ്പ ഓർമയായിപ്പോയ മകന്റെ അഭിനയസ്വപ്നങ്ങൾക്കും അലച്ചിലുകൾക്കും ചൂട്ടുപിടിച്ച ആ ഉമ്മ വിരലിൽ ഒരു ജീവിതകാലം മുഴുവൻ കോർത്ത ദസ്ബിയാണ് തിയറ്ററുകളിൽ വൻവിജയമായ സൗദി വെള്ളക്കയെന്ന ചിത്രത്തിൽ ആയിഷ റാവുത്തെറെന്ന നായിക/ഉമ്മയുടെ കൈകളിൽ നമ്മൾ കണ്ടത്.
