ഡബിൾ ഡെക്കർ ബസുകൾ കൂട്ടയിടിച്ച് എട്ട് പേർ മരിച്ചു; 30 പേർക്ക് പരിക്കേറ്റു; അപകടം യൂ പി എക്‌സ്പ്രസ് വേയിൽ
ലക്‌നൗ: രണ്ട് സ്വകാര്യ ബസുകൾ കൂട്ടിയിടിച്ച് എട്ട് പേർക്ക് ദാരുണാന്ത്യം. ഡബിൾ ഡെക്കർ ബസുകളാണ് ഇടിച്ചത്. സംഭവത്തിൽ മുപ്പതോളം പേർക്ക് പരിക്കേറ്റിട്ടുണ്ടെന്നാണ് റിപ്പോർട്ട്. ഉത്തർപ്രദേശിലെ പൂർവാഞ്ചൽ എക്‌സ്പ്രസ് വേയിൽ തിങ്കളാഴ്ച പുലർച്ചെയാണ് അപകടമുണ്ടായത്.ലോണി കോത്ര പോലീസ് സ്‌റ്റേഷൻ പരിധിയിലുള്ള നാരായൺ പൂർ ഗ്രാമത്തിന് സമീപമാണ് അപകടം സംഭവിച്ച എക്‌സ്പ്രസ് വേ കടന്നുപോകുന്നത്. രണ്ട് ബസുകളും ബിഹാറിൽ നിന്ന് ഡൽഹിയിലേക്ക് പോകുന്നവയായിരുന്നു. ഒരു ബസ് പെട്ടെന്ന് നിർത്തിയപ്പോൾ പിന്നിൽ വരികയായിരുന്ന അടുത്ത ബസ് മുമ്പിലെ ബസിനെ ഇടിച്ചു.പരിക്കേറ്റവരെ സമീപമുള്ള ലക്‌നൗ ട്രോമ സെന്ററിലാണ് പ്രവേശിപ്പിച്ചത്. 
അപകടവാർത്തയറിഞ്ഞ് ബരബങ്കി പോലീസ് സംഘം ഉടൻ സ്ഥലത്തെത്തി രക്ഷാപ്രവർത്തനം ഏകോപിപ്പിച്ചു. അപകടത്തിൽ അനുശോചനം രേഖപ്പെടുത്തിയ യുപി മുഖ്യമന്ത്രി യോഗി ആദിത്യനാഥ്, മരിച്ചവരുടെ കുടുംബാംഗങ്ങളുടെ ദുഃഖത്തോടൊപ്പം പങ്കുച്ചേരുന്നതായും അറിയിച്ചു.
