താലിചാര്‍ത്താനായി പന്തലിലെത്തിയത് രണ്ട് വരന്‍മാര്‍ ; സര്‍പ്രൈസ് നല്‍കി വധു
ലഖ്നോ: ഒരു പെണ്‍കുട്ടിക്ക് താലി ചാര്‍ത്താന്‍ രണ്ടു വരന്‍മാര്‍ അണിഞ്ഞൊരുങ്ങി പന്തലില്‍ എത്തിയാല്‍ എന്താകും സ്ഥിതി ? ഉത്തര്‍ പ്രദേശിലെ ഇറ്റാ ജില്ലയിലെ കോട്വാലി പൊലീസ് സ്റ്റേഷന്‍ പരിധിയില്‍ അങ്ങനെയൊരു സംഭവം നടന്നു .
വധുവായ മോഹനിയും ഫുലന്‍പൂര്‍ സ്വദേശിയായ ബാബ്ലുവും തമ്മിലുള്ള വിവാഹമാണ് നിശ്ചയിച്ചിരുന്നത്. വിവാഹ ദിവസം രാവിലെ ബബ്ലുവും ബന്ധുക്കളും വധുവിന്‍റെ വീട്ടിലെത്തി. വധുവിന്‍റെ ബന്ധുക്കള്‍ വരനെ സ്വീകരിക്കുന്ന ചടങ്ങിനിടെ ഹയാത്നഗര്‍ ഗ്രാമത്തിലെ രാജാറാമിന്‍റെ മകനായ അജിത്തും വരനായി മോഹിനിയുടെ വീട്ടിലെത്തിയതോടെയാണ് സംഘര്‍ഷങ്ങള്‍ക്ക് തുടക്കമിട്ടത് .
വധുവായ മോഹിനിയും അജിത്തും തമ്മില്‍ നേരത്തെ പ്രണയത്തിലായിരുന്നുവെന്നാണ് റിപ്പോര്‍ട്ടുകള്‍. ഇരുവരുടെയും ബന്ധം എതിര്‍ത്ത മോഹിനിയുടെ ബന്ധുക്കള്‍ ബബ്ലുവുമായി വിവാഹം ഉറപ്പിക്കുകയായിരുന്നു. മറ്റൊരാളുമായി മോഹിനിയുടെ വിവാഹം ഉറപ്പിച്ചെന്ന വാര്‍ത്തയറിഞ്ഞതോടെയാണ് അജിത്ത് ബന്ധുക്കളെയും കൂട്ടി വിവാഹപ്പന്തലില്‍ എത്തിയതെന്ന് പ്രമുഖ ദേശീയ മാധ്യമം റിപ്പോര്‍ട്ട് ചെയ്തു.
രണ്ടാമത്തെയാളെ വിവാഹം ചെയ്ത് വധു പോയതോടെ ആദ്യത്തെയാളും കുടുംബവും പ്രശ്നമുണ്ടാക്കി. ഒടുവില്‍ പൊലീസ് ഇടപെട്ടാണ് രംഗം ശാന്തമാക്കിയത്. വധുവിന്‍റെ പിതാവിനെയും അമ്മാവനെയും പൊലീസ് കസ്റ്റഡിയിലെടുത്ത് ചോദ്യം ചെയ്തു. കൂടാതെ രണ്ടാമത് എത്തിയ വരന്‍റെ ബന്ധുക്കളെയും പൊലീസ് അറസ്റ്റ് ചെയ്തിട്ടുണ്ട്. സംഭവത്തില്‍ പൊലീസ് കൂടുതല്‍ വിശദീകരണം നല്‍കിയില്ല .
