മുപ്പതുകാരിയുടെ വീട്ടിൽ കയറി മുഖത്ത് മുളക് പൊടി എറിഞ്ഞ് കടന്നു പിടിക്കാൻ ശ്രമം; 16-കാരന്‍ കസ്റ്റഡിയില്‍
ഇടുക്കി: മുപ്പതുകാരിയുടെ വീട്ടിൽ കയറി മുഖത്ത് മുളക് പൊടി എറിഞ്ഞ് കടന്നു പിടിക്കാൻ ശ്രമിച്ച പതിനാറുകാരനെ പൊലീസ് കസ്റ്റഡിയില്‍ എടുത്തു. കട്ടപ്പന സ്വദേശിനിയായ മുപ്പതുകാരിക്ക് നേരെയാണ് അക്രമണം ഉണ്ടായത്. ഭർത്താവ് ജോലിക്ക് പോയതിനാൽ യുവതി വീട്ടിൽ തനിച്ചായിരുന്നു. വീട്ടിൽ വന്ന് ആരോ വിളിച്ചപ്പോൾ ഭർത്താവ് ആണെന്നു കരുതി യുവതി വാതിൽ തുറന്നു. ഉടൻതന്നെ അക്രമി മുഖത്തു മുളക് പൊടിപോലെ എന്തോ വലിച്ചെറിഞ്ഞ ശേഷം കൈ
കൊണ്ട് യുവതിയുടെ മുഖത്ത് ആഞ്ഞിടിക്കുകയായിരുന്നു
തൊട്ടുപിന്നാലെ യുവതിയെ വലിച്ചിഴച്ച് വീടിനുള്ളിലേയ്ക്ക് കൊണ്ടു പോകാനുള്ള ശ്രമം തുടങ്ങി. അപ്രതീക്ഷിതമായ ആക്രമണത്തിൽ ആദ്യം ഒരു നിമിഷം അമ്പരന്ന യുവതി പെട്ടെന്ന് മനോബലം വീണ്ടെടുത്ത് ഇയാളെ തിരിച്ച് പ്രതിരോധിക്കാനും രക്ഷപ്പെടാനും ശ്രമിച്ചു. ഈ സമയം യുവതി ഉറക്കെ നിലവിളിച്ച് ആളെ കൂട്ടിയതോടെ ആക്രമി ഓടി രക്ഷപ്പെട്ടു. തുടർന്ന് പോലീസ് നടത്തിയ അന്വേഷണത്തിൽ പ്രതിയെ പിടികൂടുകയായിരുന്നു.
