വെള്ളം കുടിക്കുന്നതിനിടെ കൃത്രിമ പല്ല് അബദ്ധത്തില് വിഴുങ്ങിയ യുവതി മരിച്ചു
വെള്ളം കുടിക്കുന്നതിനിടെ അബദ്ധത്തില് കൃത്രിമപ്പല്ല് വിഴുങ്ങിയ ചെന്നൈ സ്വദേശിനി മരിച്ചു. ജൂലൈ നാലിന് വെള്ളം കുടിക്കുന്നതിനിടെയാണ് വളസരവക്കം സ്വദേശിനിയായ രാജലക്ഷ്മി തന്റെ മൂന്ന് കൃത്രിമ പല്ലുകളില് ഒന്ന് അബദ്ധത്തില് വിഴുങ്ങിയത്.
തലകറക്കവും ഓക്കാനവും അനുഭവപ്പെട്ടതിനെ തുടര്ന്ന് 43കാരിയെ ആശുപത്രിയില് പ്രവേശിപ്പിച്ചിരുന്നതായി ടൈംസ് ഓഫ് ഇന്ത്യ റിപ്പോര്ട്ട് ചെയ്തു. എന്നാല് അപകടകരമായി ഒന്നുമില്ലെന്ന് ഡോക്ടര്മാര് പറഞ്ഞതോടെ അവര് ആശുപത്രിയില് നിന്ന് ഡിസ്ചാര്ജായി. പിറ്റേ ദിവസം ബോധരഹിതയായതിനെ തുടര്ന്ന് ആശുപത്രിയിലേക്ക് കൊണ്ടുപോകുന്നതിനിടെയാണ് മരിച്ചത്.
മരണകാരണം അറിയാന് മൃതദേഹം പോസ്റ്റ്മോര്ട്ടത്തിനയച്ചു. ഐ.പി.സി 174ാം വകുപ്പ് പ്രകാരം അസ്വാഭാവിക മരണത്തിന് കേസ് രജിസ്റ്റര് ചെയ്തു. കൃത്രിമ പല്ല് ഘടിപ്പിച്ച് ഏഴ് വര്ഷമായതിനാല് അത് അയഞ്ഞ് പോയതാകാം അപകട കാരണമെന്ന് പൊലീസ് പറഞ്ഞു. സുരേഷാണ് രാജലക്ഷ്മിയുടെ ഭര്ത്താവ്. രണ്ട് ആണ്കുട്ടികളുണ്ട്.