കഞ്ചാവ്, ഹാഷിഷ് ഓയില്‍ വില്‍പനസംഘത്തിലെ യുവാവ് പിടിയില്‍
ചാവക്കാട്: കഞ്ചാവും ഹാഷിഷ് ഓയിലും വില്‍പന നടത്തുന്ന സംഘത്തിലെ യുവാവ് പിടിയില്‍. തെക്കഞ്ചേരി പെരിങ്ങാടന്‍ വീട്ടില്‍ അജിത് സുന്ദരന്‍ എന്ന കണ്ണനെയാണ് (20) ചാവക്കാട് എസ്.എച്ച്‌.ഒ അനില്‍ ടി. മേപ്പിള്ളിയുടെ നേതൃത്വത്തില്‍ അറസ്റ്റ് ചെയ്തത്.
തെക്കഞ്ചേരി കേന്ദ്രീകരിച്ച്‌ കഞ്ചാവ് വില്‍പന നടക്കുന്നുവെന്ന് രഹസ്യവിവരം ലഭിച്ചതിനെ തുടര്‍ന്ന് പൊലീസ് അന്വേഷിക്കുന്നതിനിടയിലാണ് അറസ്റ്റ്. പൊലീസ് സംഘം പ്രതികളെ തെക്കഞ്ചേരി മരമില്ല് ഭാഗത്ത് കണ്ടെത്തുകയായിരുന്നു. സംഘാംഗങ്ങള്‍ വാഹനം ഉപേക്ഷിച്ച്‌ രക്ഷപ്പെടുന്നതിനിടയിലാണ് അജിത് പിടിയിലായത്. വാഹനം പരിശോധിച്ചപ്പോള്‍ 10.05 ഗ്രാം കഞ്ചാവും 04.078 ഗ്രാം ഹാഷിഷ് ഓയിലും കത്തിയും കണ്ടെത്തി.
മറ്റു പ്രതികള്‍ക്കായുള്ള ഊര്‍ജിതമായ അന്വേഷണത്തിലാണ് പൊലീസ്. എസ്.ഐമാരായ യു.കെ. ഷാജഹാന്‍, കെ.പി. ആനന്ദ്, അനില്‍, സി.പി.ഒമാരായ ശരത്ത്, അനീഷ്, താജുദ്ദീന്‍ എന്നിവരടങ്ങുന്ന പൊലീസ് സംഘമാണ് പ്രതിയെ അറസ്റ്റ് ചെയ്തത്.
