ഹോട്ടലിലെ ലഹരി പാർട്ടി; കെട്ടിടം ഉടമയായ പിവി അൻവറിനെ ഒഴിവാക്കി കേസെടുത്തതിൽ ഇടപെട്ട് ഹൈക്കോടതി
പിവി അൻവർ എംഎൽഎയുടെ ആലുവ ഹോട്ടലിൽ നടന്ന ലഹരിപ്പാർട്ടിയുമായി ബന്ധപ്പെട്ട കേസിൽ കെട്ടിട ഉടമയായ അൻവറിനെ ഒഴിവാക്കിയതിൽ ഹൈക്കോടതി ഇടപെടൽ. പിവി അൻവറിനെ ഒഴിവാക്കിയതിനെതിരായ പരാതി പരിശോധിക്കാൻ ആഭ്യന്തര സെക്രട്ടറിക്ക് ഹൈക്കോടതി നിർദ്ദേശം നൽകി.
ആലുവ ഹോട്ടലിലെ ലഹരിപ്പാർട്ടിക്കായി സൂക്ഷിച്ച മദ്യം പിടികൂടിയ കേസിലാണ് കോടതിയുടെ ഇടപെടൽ. ഒരു മാസത്തിനുള്ളിൽ പരാതി പരിശോധിച്ച് തീരുമാനമെടുക്കാൻ കോടതി നിർദേശം നൽകി. കേസിൽ പിവി അൻവറിനെ ഒഴിവാക്കിയായിരുന്നു എക്സൈസ് കേസെടുത്തിരുന്നത്. ഇതിനെതിരായി നൽകിയ ഹർജിയിലാണ് നടപടി
2018 ലാണ് ആലുവയിലെ മലക്കപ്പടിയിലുളള റിസോർട്ടിലെ ലഹരിപ്പാർട്ടിക്കിടെ മദ്യം പിടികൂടിയത്. ലൈസൻസ് ഇല്ലാതെ റിസോർട്ടിൽ മദ്യം സൂക്ഷിച്ച് വിതരണം ചെയ്യുന്നുവെന്നായിരുന്നു എക്സൈസിന് രഹസ്യ വിവരം ലഭിച്ചത്. എക്സൈസ് എത്തി പരിശോധിച്ച് മദ്യവും അഞ്ച് പേരെയും പിടികൂടി. സംഭവത്തിൽ പിവി അൻവറിനെ ഒഴിവാക്കിയാണ് കുറ്റപത്രം എക്സൈസ് സമർപ്പിച്ചത്. ഇത് ചോദ്യം ചെയ്താണ് മലപ്പുറം സ്വദേശിയാണ് ഹൈക്കോടതിയെ സമർപ്പിച്ചത്.
