വിഷുദിനത്തിൽ സ്വർണവില പവന് 560 രൂപ കുറഞ്ഞു:പവന് 44760
വിഷുദിനത്തിൽ സ്വർണവില പവന് 560 രൂപ കുറഞ്ഞു:പവന് 44760
സംസ്ഥാനത്ത് സ്വർണപ്രേമികൾക്ക് അനുഗ്രഹമായി വിഷു.പവന് 560 രൂപ ഇടിഞ്ഞ് 44,760 രൂപയിലും, ഗ്രാമിന് 30 രൂപ കുറഞ്ഞ് 5,595 രൂപയിലുമാണു വ്യാപാരം പുരോഗമിക്കുന്നത്. ഇന്നലെ പവന് 440 രൂപ കുതിച്ച് ചരിത്രത്തിലെ ഏറ്റവും ഉയർന്ന നിരക്കായ 45,320 രൂപ രേഖപ്പെടുത്തിയിരുന്നു. ആഗോള വിപണിയിലെ വിലയിടിവാണ് പ്രാദേശിക സ്വർണവിലയിൽ പ്രതിഫലിച്ചത്
ആഗോള വിപണിയിൽ 24 മണിക്കൂറിനിടെ സ്വർണം ഔൺസിന് 1.74 ശതമാനം (35.44 ഡോളർ) വിലയിടിഞ്ഞ് 2,004.39 ഡോളറിലെത്തി. ഇന്നലെ ഇതേസമയം സ്വർണം ഔൺസിന് 2,045.87 ഡോളറായിരുന്നു. ഒരുവേള ഇത് 2,048.77 ഡോളർ വരെ ഉയർന്നിരുന്നു. 30 ദിവസത്തിനിടെ ആഗോള സ്വർണവിലയിൽ ഔൺസിന് 6.16 ശതമാനം (118.42 ഡോളർ) വില വർധിച്ചു. ആറു മാസത്തിനിടെ സ്വർണവിലയിലെ കയറ്റം 23.57 ശതമാനമാണ് (389.13 ഡോളർ)
ആഗോള വിപണിയിലെ വിലമാറ്റം ഡോളറിലായതു കൊണ്ടു തന്നെ ചെറിയ ചലനങ്ങൾ പോലും പ്രാദേശിക വിപണികളിൽ വലിയ ചലനങ്ങൾക്കു വഴിവയ്ക്കും. ഡോളർ- രൂപ വിനിമയ നിരക്കും ഇവിടെ വലിയ പ്രധാന്യമർഹിക്കുന്നു. ആഗോള എണ്ണവില കുതിക്കുന്നത് ഇപ്പോഴും പണപ്പെരുപ്പ ഭീഷണിക്കു കാരണമാണ്. സാമ്പത്തികമാന്ദ്യ ഭീതി നിലനിൽക്കുന്നതു വരെ സ്വർണം നിലമെച്ചപ്പെടുത്തുമെന്നാണു വിലയിരുത്തൽ. ഈ വർഷം അവസാനത്തോടെ ആഗോള സ്വർണാവില 3,000 ഡോളറിലേയ്ക്ക് അടുക്കുമെന്നാണു റിപ്പോർട്ടുകൾ.
പ്രാദേശിക വിപണിയിൽ വിവാഹ- ഉത്സവ സീസൺ കൈയ്യെത്തും ദൂരത്താണ്. സ്വർണവില ഇനിയും ഉയരാനുള്ള സാധ്യതയാണ് മുന്നിലുള്ളത്. 44,000 രൂപയിൽ മാസം തുടങ്ങിയ സ്വർണം ഈ മാസം മൂന്നിന് 43,760 രൂപയിലെത്തിയിരുന്നു. ഈ മാസത്തെ ഏറ്റവും താഴ്ന്ന നിരക്ക് ഇതാണ്. തുടർന്ന് അഞ്ചാം തീയതി 45,000 രൂപയിലെത്തി. ഇന്നലെ ഇത് 45,320 രൂപയിലെത്തുകയായിരുന്നു.
നിക്ഷേപകരെ സംബന്ധിച്ച് സ്വർണവിലയിലെ കുത്തനെയുള്ള കുതിപ്പ് വൻ പ്രചോദനമായിരിക്കുകയാണ്. മാസങ്ങൾക്കുള്ളിൽ സ്വർണവിലയിൽ വൻ കുതിപ്പാണ് രേഖപ്പെടുത്തിയിട്ടുള്ളത്. നിക്ഷേപകരെ സംബന്ധിച്ചു സ്വർണത്തിലെ പ്രവചനങ്ങൾ ഇനിയും അവസരത്തെ സൂചിപ്പിക്കുന്നു. അതേസമയം വരും ദിവസങ്ങളിൽ പ്രാദേശിക സ്വർണവില കുറയാൻ സാധ്യതയുണ്ട്. നിലവിലെ റെക്കോഡ് നിലവാരം തന്നെ കാരണം.
ഇനിയുള്ള ഇറക്കം നിക്ഷേപകർക്കും, ആഭരണപ്രിയർക്കും വളരെ പ്രധാനമാണ്. നിക്ഷേപകർ ഓരോ ഇറക്കത്തിലും സ്വർണം വാങ്ങിക്കൂട്ടുക. ആഭരണപ്രിയർ ബുക്കിംഗുകൾക്കു മുൻതൂക്കം നൽകുക. ബുക്കിംഗുകൾ വഴി സ്വർണവില കൂടിയാൽ ബുക്കിംഗ് വിലയിലും, വില കുറഞ്ഞാൽ വിപണി വിലയിലും സ്വർണം സ്വന്തമാക്കാൻ സാധിക്കും.
സംസ്ഥാനത്ത് നിലവിൽ വെള്ളി വിലയിൽ മാറ്റമില്ല. ഗ്രാമിന് 83 രൂപയിലാണ് വ്യാപാരം പുരോഗമിക്കുന്നത്. 8 ഗ്രാം വെള്ളിക്ക് 664 രൂപയും, 10 ഗ്രാം വെള്ളിക്ക് 830 രൂപയുമാണ്. വെള്ളി കിലോയ്ക്ക് 83,000 രൂപയാണ്.
അതേസമയം സ്വർണവിലക്കയറ്റം വെള്ളിയേയും സ്വാധീനിക്കുമെന്ന കാര്യത്തിൽ തർക്കമില്ല. വരും മണിക്കൂറുകളിൽ വില കൂടാം.
