'ഇന്നസെന്റ് ചേട്ടന് ഞാൻ ആദരാഞ്ജലികൾ അർപ്പിക്കുന്നില്ല; മരിച്ചുപോയെന്നും വിശ്വസിക്കുന്നില്ല': സലീം കുമാർ
കൊച്ചി: ഇന്നസെന്റ് ചേട്ടന് താൻ ആദരാഞ്ജലികൾ അർപ്പിക്കുന്നില്ലെന്ന് നടൻ സലീം കുമാർ. മരിച്ചുപോയെന്നും വിശ്വസിക്കുന്നില്ല. ഇന്നസെന്റ് എന്ന ചിരിമഴ പെയ്തു തീർന്നു. എങ്കിലും ആ മഴ ചങ്കിലെ വൃക്ഷ തലപ്പുകളിൽ ബാക്കി വച്ചിട്ട് പോയ മഴത്തുള്ളികൾ ഓർമകളുടെ നനുത്ത കാറ്റിൽ ജീവിതാവസാനം വരെ നമ്മളിൽ പെയ്തുകൊണ്ടേയിരിക്കുമെന്നും സലീം കുമാർ പറഞ്ഞു.
‘അദ്ദേഹം ദൂരെ എവിടെയോ, നമുക്കൊന്നും കാണാൻ പറ്റാത്ത ഒരു ലൊക്കേഷനിൽ ഷൂട്ടിങ്ങിന് പോയതാണെന്നാണ് വിശ്വസിക്കുന്നത്. ആ സിനിമയിൽ ഞാനുമുണ്ട് പക്ഷേ എന്റെ ഡേറ്റ് ഇതുവരെ ആയിട്ടില്ല, ആവും, ആവാതിരിക്കാൻ പറ്റില്ലലോ’- സലീം കുമാർ പറഞ്ഞു.
‘എന്നാലും മാസത്തിൽ രണ്ടു തവണയെങ്കിലും എന്റെ ഫോണിൽ തെളിഞ്ഞു വരാറുള്ള Innocent ഇനി മുതൽ വരില്ല എന്നോർക്കുമ്പോൾ………’- പറഞ്ഞുനിർത്തുമ്പോൾ സലീം കുമാറിന്‍റെ ശബ്ദം ഇടറി.
ഞായറാഴ്ച രാത്രി 10.30ഓടെയാണ് എറണാകുളത്തെ സ്വകാര്യ ആശുപത്രിയിൽ ഇന്നസെന്റ് അന്തരിച്ചത്. സിനിമാ അഭിനയത്തിന് പുറമെ നിര്‍മ്മാതാവും മുന്‍ ലോക്സഭാ അംഗമായിരുന്നു . മലയാള ചലച്ചിത്ര താരങ്ങളുടെ സംഘടനായ അമ്മയുടെ പ്രസിഡന്‍റായി 12 വര്‍ഷത്തോളം പ്രവര്‍ത്തിച്ചു. 2014ലെ ലോക്സഭാ തെരഞ്ഞെടുപ്പില്‍ ചാലക്കുടിയില്‍ നിന്ന് എല്‍ഡിഎഫ് സ്വതന്ത്ര സ്ഥാനാര്‍ഥിയായി വിജയിച്ചു.
