സിനിമാ സെറ്റുകളിലെ സ്ത്രീ സുരക്ഷ; ആഭ്യന്തര പരാതി പരിഹാര കമ്മിറ്റികൾ ഉടൻ നടപ്പിലാക്കുമെന്ന് സിനിമാ സംഘടനകൾ
തിരുവനന്തപുരം: സിനിമാ സെറ്റുകളിൽ സ്ത്രീ സുരക്ഷയ്ക്കായുള്ള ആഭ്യന്തര പരാതി പരിഹാര കമ്മിറ്റികൾ ഉടൻ നടപ്പിലാക്കുമെന്ന് സിനിമാ സംഘടനകൾ. വനിതാ കമ്മീഷൻ അധ്യക്ഷ പി സതീദേവി വിളിച്ചുചേർത്ത പ്രത്യേക സിറ്റിങ്ങിലാണ് സംഘടനാ പ്രതിനിധികളുടെ ഉറപ്പ്. മേൽനോട്ടത്തിന് സംസ്ഥാനതലത്തിൽ സമിതി രൂപീകരിക്കും.
എല്ലാ ഷൂട്ടിങ് ലൊക്കേഷനുകളിലും സ്ത്രീകൾക്ക് മുൻഗണന നൽകിയുള്ള അഞ്ചംഗ സമിതികളുണ്ടാകും. ഈ സമിതിയാകും പരാതികൾ സ്വീകരിക്കുക. പിന്നീടിത് ചർച്ച ചെയ്ത് സംസ്ഥാനതല മേൽനോട്ട സമിതിക്ക് കൈമാറും. അവിടെ നിന്നാണ് ആവശ്യമെങ്കിൽ നിയമനടപടികൾക്കായി പൊലീസിന് കൈമാറുക. നിലവിൽ രജിസ്റ്റർ ചെയ്തു ഷൂട്ടിങ് തുടങ്ങുന്ന സിനിമകൾക്ക് പുറമെ ഒ.ടി.ടി പ്ലാറ്റ്ഫോമുകളിലേക്ക് നടക്കുന്ന ചിത്രീകരണം ഉള്ളവയിലേക്കും പ്രവർത്തനം വ്യാപിപ്പിക്കും. അമ്മ, ഫെഫ്ക, മാക്ട, പ്രൊഡ്യൂസേഴ്സ്, എന്നി സംഘടനകൾക്കൊപ്പം ഡബ്ല്യുസിസി കൂടി ഇരുന്നാണ് തീരുമാനം എടുത്തത്.
