പോക്സോ കേസില്‍ ടെലിവിഷന്‍ താരം അറസ്റ്റില്‍
മുംബൈ: പോക്സോ കേസില്‍ ടെലിവിഷന്‍ താരം പേള്‍ വി. പുരി അറസ്റ്റില്‍. നിലവില്‍ പൊലീസ് കസ്റ്റഡിയിലാണ് പേള്‍. പ്രായപൂര്‍ത്തിയാകാത്ത പെണ്‍കുട്ടിയെ ടെലിവിഷന്‍ സീരിയലുകളില്‍ അഭിനയിക്കാന്‍ അവസരം വാഗ്ദാനം ചെയ്ത് ബലാത്സംഗം ചെയ്തുവെന്നും അപമാനിച്ചുവെന്നുമാണ് നടനെതിരെയുള്ള പരാതി.
നടനെതിരെയും മറ്റു അഞ്ചുപേര്‍ക്കുമെതിരെയുമാണ് മാല്‍വാനി പൊലീസ് കേസെടുത്തിരുന്നത്. പ്രതികള്‍ ആദ്യം കാറില്‍വെച്ച്‌ ബലാത്സംഗം ചെയ്തതായും പിന്നീടും നിരവധി തവണ പീഡിപ്പിച്ചതായും പെണ്‍കുട്ടി പൊലീസിന് നല്‍കിയ മൊഴിയില്‍ പറയുന്നു.
പെണ്‍കുട്ടിയും കുടുംബവും പരാതി നല്‍കിയതിനെ തുടര്‍ന്ന് വെള്ളിയാഴ്ച വൈകിട്ടാണ് താരം അറസ്റ്റിലാകുന്നത്. നിരവധി ടെലിവിഷന്‍ പരിപാടികളിലൂടെ പ്രേക്ഷക ശ്രദ്ധ നേടിയ നടനാണ് പേള്‍. നാഗിന്‍ 3, ബ്രഹ്മരക്ഷസ് 2, ദില്‍ കി നസര്‍ സേ ഖൂബ്സുരത്ത് തുടങ്ങിയ സീരിയലുകളില്‍ ശ്രദ്ധേയ വേഷമിട്ടിരുന്നു.
