വയനാട് എംപി ആയാൽ സുൽത്താൻ ബത്തേരി 'ഗണപതിവട്ടം' ആക്കും; കെ.സുരേന്ദ്രൻ
ലോക്‌‌സഭാ തെരഞ്ഞെടുപ്പിൽ വിജയിച്ച് എംപിയായാല്‍ ആദ്യം സുൽത്താൻ ബത്തേരിയുടെ പേര് മാറ്റുമെന്ന് എൻഡിഎ സ്ഥാനാർത്ഥിയും ബിജെപി സംസ്ഥാന അധ്യക്ഷനുമായ കെ. സുരേന്ദ്രൻ. വയനാട്ടിൽ നടത്തിയ വാർത്താ സമ്മേളനത്തിലാണ് അദ്ദേഹം ഇക്കാര്യം പറഞ്ഞത്. ഗണപതിവട്ടം എന്നതാണ് സുല്‍ത്താന്‍ ബത്തേരിയുടെ പേരെന്നും വൈദേശികാധിപത്യത്തിന്റെ ഭാഗമായി വന്നതാണ് ഇപ്പോഴത്തെ പേരെന്നും സുരേന്ദ്രൻ പറഞ്ഞു. 1984ല്‍ പ്രമോദ് മഹാജന്‍ ഈ വിഷയം ഉന്നയിച്ചതാണെന്നും സുരേന്ദ്രന്‍ പറഞ്ഞു.
ഒരു ദേശീയ മാധ്യമത്തിന് മുന്‍പ് നല്‍കിയ അഭിമുഖത്തില്‍ സുരേന്ദ്രന്‍ സുല്‍ത്താന്‍ ബത്തേരിയുടെ പേരുമാറ്റത്തെ കുറിച്ച് തന്റെ നിലപാട് വ്യക്തമാക്കിയിരുന്നു. ഇക്കാര്യമാണ് അദ്ദേഹം വീണ്ടും ആവര്‍ത്തിച്ചത്.
‘ടിപ്പു സുല്‍ത്താന്‍റെ വരവോടെയാണ് ഈ പേര് വന്നത്, ഗണപതി വട്ടം എന്ന പേരിനെ കുറിച്ച് വയനാട്ടിലെ ജനങ്ങള്‍ക്ക് ഇക്കാര്യം അറിവുള്ളതാണ്. വയനാട്ടിലെയും പരിസര പ്രദേശങ്ങളിലെയും ക്ഷേത്രങ്ങള്‍ നശിപ്പിക്കുകയും നിരവധി പേരെ മതംമാറ്റിയ ആളുമാണ് ടിപ്പു സുല്‍ത്താന്‍’- കെ.സുരേന്ദ്രന്‍ പറഞ്ഞു.
