National
ഹിമാചല് പ്രദേശില് വീണ്ടും ആശങ്കയായി മഴ
ഹിമാചല് പ്രദേശില് വീണ്ടും ആശങ്കയായി മഴ.സംസ്ഥാനത്തുണ്ടായ മണ്ണിടിച്ചിലില് 12 പേര് മരിച്ചു. കുളുവിലുണ്ടായ മണ്ണിടിച്ചിലില് നിരവധി വീടുകള് തകര്ന്നു. 400 ഓളം റോഡുകള് അടച്ചിട്ടു. അടുത്ത 24 മണിക്കൂറില് ഷിംല ഉള്പ്പെടെയുള്ള 6 ജില്ലകളില് അതിശക്തമായ മഴ പെയ്യുമെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്കി.
സംസ്ഥാനത്ത് റെഡ് അലര്ട്ട് തുടരുകയാണ്. കനത്ത മഴയ്ക്ക് സാധ്യതയുള്ളതിനാല് ജനങ്ങള് ജാഗ്രത പാലിക്കണമെന്ന് മുഖ്യമന്ത്രി സുഖ് വിന്ദര് സിംഗ് സുഖു അറിയിച്ചു.ജൂണ് 24ന് ഹിമാചല്പ്രദേശില് ആരംഭിച്ച മഴക്കെടുതിയില് 238 പേര്ക്കാണ് ഇതുവരെ ജീവന് നഷ്ടമായത്.അതേ സമയം ഉത്തരാഖണ്ഡിലും മഴ തുടരുന്നു. സംസ്ഥാനത്തെ നദികളെല്ലാം കരകവിഞ്ഞൊഴുകുകയാണ്.