അധ്യാപികമാരുടെയും സഹപാഠികളുടെയും ചിത്രം അശ്ലീല സൈറ്റിൽ; വിദ്യാർഥി അറസ്റ്റിൽ
അധ്യാപികമാരുടെയും സഹപാഠികളുടെയും ചിത്രം അശ്ലീല സൈറ്റിൽ; വിദ്യാർഥി അറസ്റ്റിൽ
ഓൺലൈൻ ക്ലാസിനിടെ അധ്യാപികമാരുടെയും സഹപാഠികളായ വിദ്യാർഥികളുടെയും ചിത്രം പകർത്തി അശ്ലീല സൈറ്റിൽ പോസ്റ്റ് ചെയ്ത പ്ലസ്വൺ വിദ്യാർഥി അറസ്റ്റിൽ. സൈബർ പൊലീസാണ് വിദ്യാർഥിയെ അറസ്റ്റ് ചെയ്തത്. ക്ലാസിലെ 40 വിദ്യാർഥിനികളുടെയും 5 അധ്യാപികമാരുടെയും ചിത്രങ്ങൾ വിദ്യാർഥി പകർത്തി. വഴക്കു പറഞ്ഞ അധ്യാപകനെ കൊല്ലുമെന്ന് ഭീഷണിപ്പെടുത്തുകയും ചെയ്തു.
പേരു വെളിപ്പെടുത്താതെ അപരിചിതരുമായി ചാറ്റ് ചെയ്യാൻ സാധിക്കുന്ന കനേഡിയൻ ഡേറ്റിങ് സൈറ്റിലൂ‍ടെയാണ് വിദ്യാർഥി ഇതു ചെയ്തത്. ഓൺലൈൻ ക്ലാസിനിടെ ചിത്രങ്ങൾ സ്ക്രീൻ ഷോട്ടാ‍യി പകർത്തി. ഇതിനു ശേഷം അശ്ലീല കമന്റുകൾ ചേർത്ത് എഡി‍റ്റ് ചെയ്ത് ഇതേ വിദ്യാർഥിനികൾ ചെയ്തതെന്നു തോന്നിപ്പിക്കും വിധം സൈറ്റിൽ പോസ്റ്റ് ചെയ്തു. മൊബൈൽ നമ്പറും ചേർത്തു.
അജ്ഞാതരായ പലരിൽ നിന്നും അശ്ലീല സന്ദേശങ്ങളും ഭീഷണിയും ഫോണിലൂടെ വിദ്യാർഥിനികൾക്കും അധ്യാപകർക്കും നിരന്തരം ലഭിച്ചതോടെയാണ് സൈബർ പൊലീസ് അന്വേഷണം തുടങ്ങിയത്. ഉപയോഗിക്കുന്നവരുടെ തിരിച്ചറിയൽ വിവരങ്ങളൊന്നും ലഭ്യമല്ലാത്ത വെബ്സൈറ്റിൽ നിന്നു കുറ്റവാളിയെ കണ്ടെത്തുന്ന‍തിനായി രണ്ടാഴ്ചയിലേറെ പൊലീസ് ഒട്ടേറെ നെറ്റ് വർക്കുകളും ഫോണുകളും നിരീ‍ക്ഷിച്ചു. തുടർന്നാണ് വിദ്യാർഥിയെ തിരിച്ചറിഞ്ഞത്. ഇയാളുടെ മൊബൈൽ ഫോണും പിടിച്ചെടുക്കുകയായിരുന്നു.
