റിയാദ് സീസൺ കപ്പ്; ഇന്റർ മയാമിയെ തകർത്തെറിഞ്ഞ് അൽ നസർ
റിയാദ്: മേജർ ലീഗ് സോക്കർ സീസണിന് മുമ്പായുള്ള സൗഹൃദ മത്സരത്തിൽ ഇന്റർ മയാമിക്ക് വീണ്ടും തോൽവി. സൗദി പ്രോ ലീഗ് ക്ലബ് അൽ നസറിനോട് എതിരില്ലാത്ത ആറ് ഗോളിനാണ് മയാമിയുടെ പരാജയം. ആൻഡേഴ്സൺ ടലിസ്കയുടെ ഹാട്രിക് മികവിലാണ് അൽ നസർ തകർപ്പൻ വിജയം നേടിയത്. പരിക്കേറ്റ അൽ നസർ നായകൻ ക്രിസ്റ്റ്യാനോ റൊണാൾഡോ കളിച്ചില്ല. എന്നാൽ ശാരീരിക അസ്വസ്ഥതകൾ ഉണ്ടായിരുന്ന മയാമി നായകൻ ലയണൽ മെസ്സി 84-ാം മിനിറ്റിൽ പകരക്കാരനായി കളത്തിൽ ഇറങ്ങി.
മത്സരത്തിന്റെ മൂന്നാം മിനിറ്റിൽ തന്നെ ആദ്യ ഗോൾ പിറന്നു. ഒട്ടാവിയോ ആണ് ആദ്യ ഗോൾ നേടിയത്. 10-ാം മിനിറ്റിൽ ടലിസ്ക തന്റെ ആദ്യ ഗോൾ നേടി. 12-ാം മിനിറ്റിലെ അയ്മെറിക് ലപ്പോർട്ടയുടെ ഗോൾ സെന്റർ സർക്കിളിനും പിന്നിൽ നിന്നായിരുന്നു. ആദ്യ പകുതിയിൽ മൂന്ന് ഗോളിന്റെ ആധികാരിക ലീഡാണ് അൽ നസറിന് ഉണ്ടായിരുന്നത്.രണ്ടാം പകുതിയിൽ 51-ാം മിനിറ്റിൽ ടലിസ്ക വീണ്ടും ഗോൾ നേടി. പെനാൽറ്റിയിലൂടെയാണ് ഗോൾ. 68-ാം മിനിറ്റിൽ മുഹമ്മദ് മാരനായിരുന്നു ഗോൾ അടിച്ചത്. 73-ാം മിനിറ്റിൽ ടലിസ്ക തന്റെ ഹാട്രിക് പൂർത്തിയാക്കി. ഇതോടെ അൽ നസർ ആറ് ഗോളിന് മുന്നിലായി. ആരാധകർക്ക് വേണ്ടി 84-ാം മിനിറ്റിൽ ലയണൽ മെസ്സി കളത്തിലിറങ്ങിയത് മാത്രമാണ് ഇന്റർ മയാമിക്ക് എടുത്ത് പറയാനുള്ളത്.
