സാമ്പത്തികശാസ്ത്രത്തിനുള്ള നൊബേൽ പുരസ്ക്കാരം ക്ലോഡിയ ഗോൾഡിന്; പുരസ്‍കാരത്തിന് അർഹയാകുന്ന മൂന്നാമത്തെ വനിത
2023 ലെ സാമ്പത്തിക ശാസ്ത്രത്തിനുള്ള നൊബേൽ സമ്മാനം ക്ലോഡിയ ഗോൾഡിന്. അമേരിക്കയിലെ ഹാർവാർഡ് സർവകലാശാലയിലെ പ്രൊഫസറാണ് ഗോൾഡിൻ. സ്ത്രീകളുടെ തൊഴിൽ വിപണി ഫലങ്ങളെക്കുറിച്ചുള്ള പഠനങ്ങളും വിലയിരുത്തലുകളും കണക്കിലെടുത്താണ് പുരസ്ക്കാരം. “തൊഴിൽ വിപണിയിലെ സ്ത്രീകളുടെ ചരിത്രപരവും സമകാലികവുമായ പങ്കിനെക്കുറിച്ചുള്ള പുതിയതും പലപ്പോഴും ആശ്ചര്യപ്പെടുത്തുന്നതുമായ ഉൾക്കാഴ്ചകൾ ക്ലൗഡിയ ഗോൾഡിൻ ഞങ്ങൾക്ക് നൽകിയിട്ടുണ്ട്,” നോബൽ പുരസ്ക്കാര നിർണയ കമ്മിറ്റി പത്രക്കുറിപ്പിൽ പറഞ്ഞു.
സാമ്പത്തിക ശാസ്ത്രത്തിനുള്ള നൊബേൽ പുരസ്ക്കാരത്തിന് അർഹയാകുന്ന മൂന്നമത്തെ വനിതയാണ് ഗോൾഡിൻ.എലിനോർ ഓസ്‌ട്രോം (Elinor Ostrom 2009) എസ്തർ ഡഫ്‌ളോ (Esther Duflo 2019) എന്നിവരാണ് ഇതിനു മുമ്പ് സാമ്പത്തിക ശാസ്ത്രത്തിൽ നോബൽ ലഭിച്ച വനിതകൾ
ഉയർന്ന വരുമാനമുള്ള പല രാജ്യങ്ങളിലും കൂലിപ്പണി ചെയ്യുന്ന സ്ത്രീകളുടെ അനുപാതം മൂന്നിരട്ടിയായിട്ടും കാര്യമായ ലിംഗ വ്യത്യാസങ്ങളുടെ ഉറവിടം വിശദീകരിക്കുന്നതിനുള്ള സമഗ്രമായ സമീപനത്തിനാണ് ഗോൾഡിന് പുരസ്‌കാരം ലഭിച്ചതെന്ന് അവർ ചൂണ്ടിക്കാട്ടി. അക്കാദമിയുടെ സെക്രട്ടറി ജനറൽ ഹാൻസ് എല്ലെൻഗ്രൻ ഈ വർഷത്തെ വിജയികളെ പ്രഖ്യാപിച്ചു.
സാമ്പത്തിക ശാസ്ത്രത്തിലെ ആദ്യ നൊബേൽ സമ്മാനം 1969-ൽ റാഗ്നർ ഫ്രിഷ്, ജാൻ ടിൻബെർഗൻ എന്നിവർക്ക് ഇക്കണോമെട്രിക്സ് മേഖലയിലെ പ്രവർത്തനത്തിന് ലഭിച്ചു. 1969-2022 സാമ്പത്തിക ശാസ്ത്രത്തിൽ 54 പേർക്കാണ് നൊബൈൽ പുരസ്ക്കാരം ലഭിച്ചത്.
ബെൻ എസ്. ബെർനാങ്കെ, ഡഗ്ലസ് ഡബ്ല്യു. ഡയമണ്ട്, ഫിലിപ്പ് എച്ച്. ഡൈബ്വിഗ് എന്നിവർക്ക് ബാങ്കുകളെയും സാമ്പത്തിക പ്രതിസന്ധികളെയും കുറിച്ചുള്ള ഗവേഷണങ്ങൾക്കായി 2022 ലെ ആൽഫ്രഡ് നൊബേലിന്റെ സ്മരണയ്ക്കായി സാമ്പത്തിക ശാസ്ത്രത്തിനുള്ള Sveriges Riksbank സമ്മാനം ലഭിച്ചു.
ആൽഫ്രഡ് നൊബേലിന്റെ സ്മരണയ്ക്കായി സാമ്പത്തിക ശാസ്ത്രത്തിനുള്ള സ്വെറിജസ് റിക്സ്ബാങ്ക് പ്രൈസ് എന്ന് ഔദ്യോഗികമായി അറിയപ്പെടുന്ന സാമ്പത്തിക ശാസ്ത്രത്തിനുള്ള നോബൽ സമ്മാനം, സാമ്പത്തിക മേഖലയിലെ മികച്ച സംഭാവനകൾക്കുള്ള അന്താരാഷ്ട്ര പുരസ്കാരമാണ്.
സാമ്പത്തിക ശാസ്ത്രത്തിനുള്ള നോബൽ സമ്മാനം അല്ലെങ്കിൽ സാമ്പത്തിക ശാസ്ത്രത്തിലെ സ്വെറിജസ് റിക്സ്ബാങ്ക് സമ്മാനം, ഗവേഷണം, കണ്ടെത്തലുകൾ സംഭാവനകൾ എന്നിവയിലൂടെ സാമ്പത്തിക മേഖലയിൽ കാര്യമായ സ്വാധീനം ചെലുത്തിയ വ്യക്തികൾക്കോ വ്യക്തികൾ ഉൾപ്പെട്ട സംഘത്തിനോ ആണ് നൽകുന്നത്. ഈ മേഖലയിലെ വിദഗ്ധരുടെ ഒരു കമ്മിറ്റിയുടെ ശുപാർശകളുടെ അടിസ്ഥാനത്തിൽ റോയൽ സ്വീഡിഷ് അക്കാദമി ഓഫ് സയൻസസാണ് പുരസ്കാര ജേതാക്കളെ തിരഞ്ഞെടുക്കുന്നത്.മെഡിസിൻ, ഫിസിക്‌സ്, കെമിസ്ട്രി, സമാധാനം, സാഹിത്യം എന്നീ മേഖലകളിലുള്ള ഈ വർഷത്തെ നൊബേൽ പുരസ്ക്കാരങ്ങൾ നേരത്തെ പ്രഖ്യാപിച്ചിരുന്നു. “കോവിഡ്-19 നെതിരെ ഫലപ്രദമായ mRNA വാക്സിനുകൾ വികസിപ്പിക്കാൻ പ്രാപ്തമാക്കിയ ന്യൂക്ലിയോസൈഡ് ബേസ് പരിഷ്ക്കരണങ്ങളെക്കുറിച്ചുള്ള കണ്ടെത്തലുകൾക്ക്” കാറ്റലിൻ കാരിക്കോയും ഡ്രൂ വെയ്‌സ്‌മാനും 2023-ലെ ഫിസിയോളജി അല്ലെങ്കിൽ മെഡിസിൻ നോബൽ സമ്മാനം നേടി.
