സിനിമാട്ടോഗ്രാഫ് ബിൽ 2023 പാസാക്കി; സിനിമയുടെ ലൈസൻസിംഗ് നടപടിക്രമങ്ങൾ ലളിതമാക്കുകയും പൈറസി തടയുകയും ലക്ഷ്യം
രാജ്യത്തെ സിനിമാ വ്യവസായത്തെ സഹായിക്കുന്നതിനും ലൈസൻസിംഗ് നടപടിക്രമങ്ങൾ ലളിതമാക്കുന്നതിനായി പൈറസി തടയുന്നതിനുമുള്ള ബിൽ വ്യാഴാഴ്ച രാജ്യസഭ പാസാക്കി. ഒരു നോമിനേറ്റഡ് അംഗം രാജ്യ സഭാ ചെയറിലിരിക്കെ, ഒരു ബില്ലു വോട്ടിനിട്ട് പാസാക്കുന്ന നിമിഷങ്ങളാണ് കഴിഞ്ഞ ദിവസം രാജ്യസഭയിൽ നടന്നത്. ലയാളിയായ പി.ടി. ഉഷയുടെ മറ്റൊരു കാൽ വെയ്പ്പാണ് ചരിത്രത്തിൽ രേഖപ്പെടുത്തിയത്.
1952ലെ സിനിമാട്ടോഗ്രാഫ് നിയമം ഭേദഗതി ചെയ്യാൻ ശ്രമിക്കുന്ന ബിൽ ശബ്ദവോട്ടോടെയാണ് പാസാക്കിയത്. ബില്ലിൽ, സിനിമകളുടെ പൈറേറ്റഡ് കോപ്പികൾ നിർമ്മിക്കുന്ന വ്യക്തികൾക്ക് പരമാവധി മൂന്ന് വർഷം തടവും ഒരു സിനിമയുടെ നിർമ്മാണ ചെലവിന്റെ അഞ്ച് ശതമാനം വരെ പിഴയും സർക്കാർ നിർദ്ദേശിച്ചിട്ടുണ്ട്.
10 വർഷത്തെ സാധുത കാലയളവ് ഒഴിവാക്കി, ശാശ്വത സാധുതയുള്ള സിനിമകൾക്ക് സെൻട്രൽ ബോർഡ് ഓഫ് ഫിലിം സർട്ടിഫിക്കേഷൻ (സിബിഎഫ്‌സി) ഗ്രാന്റ് സർട്ടിഫിക്കറ്റ് അനുവദിക്കാനും സിനിമാറ്റോഗ്രാഫ് (ഭേദഗതി) ബിൽ-2023 നിർദ്ദേശിക്കുന്നു. ‘യുഎ’ വിഭാഗത്തിന് കീഴിൽ ‘യുഎ 7+’, ‘യുഎ 13+’, ‘യുഎ 16+’ എന്നീ മൂന്ന് പ്രായാധിഷ്‌ഠിത സർട്ടിഫിക്കേഷനുകൾ അവതരിപ്പിക്കാനും ടെലിവിഷനിലോ മറ്റ് മാധ്യമങ്ങളിലോ പ്രദർശനത്തിന് പ്രത്യേക സർട്ടിഫിക്കറ്റ് സഹിതം സിനിമ അനുവദിക്കുന്നതിന് സിബിഎഫ്‌സിയെ അധികാരപ്പെടുത്താനും ബിൽ ശ്രമിക്കുന്നുണ്ട്.
സിനിമകളുടെ അനധികൃത റെക്കോർഡിംഗും (വിഭാഗം 6AA), അവയുടെ പ്രദർശനവും (വിഭാഗം 6AB) നിരോധിക്കുന്നതിനുള്ള വ്യവസ്ഥകളോടെ സിനിമാട്ടോഗ്രാഫ് നിയമത്തിൽ പുതിയ വകുപ്പുകൾ കൊണ്ടുവരാനും ബിൽ ശ്രമിക്കുന്നു. ബില്ലിലെ കർക്കശമായ പുതിയ വ്യവസ്ഥ 6AA, ഒരേ ഉപകരണത്തിൽ റെക്കോർഡിംഗ് ഉപയോഗിക്കുന്നതിനുള്ള ഒരേയൊരു ഉദ്ദേശ്യത്തോടെ ഒരു ഫിലിം അല്ലെങ്കിൽ അതിന്റെ ഏതെങ്കിലും ഭാഗം റെക്കോർഡു ചെയ്യുന്നത് നിരോധിക്കുന്നുണ്ട്.
പൈറസി മൂലം സിനിമാ വ്യവസായത്തിനുണ്ടാകുന്ന 20,000 കോടി രൂപയുടെ നഷ്ടം അവസാനിപ്പിക്കാനാണ് ഇത് കൊണ്ടുവന്നതെന്ന് ഉപരിസഭയിൽ നടന്ന ചർച്ചയ്ക്ക് മറുപടിയായി ഇൻഫർമേഷൻ ആൻഡ് ബ്രോഡ്കാസ്റ്റിംഗ് മന്ത്രി അനുരാഗ് താക്കൂർ പറഞ്ഞു.
