കൊരട്ടിക്കര: 2026 – 2027 വർഷത്തെ കുന്ദംകുളം ഉപജില്ലാ കായികമേളയിൽ മിന്നുന്ന വിജയവുമായി കൊരട്ടിക്കര ഗവ. യു.പി സ്കൂൾ. എൽ.പി. കിഡ്ഡീസ് വിഭാഗത്തിൽ മികച്ച പ്രകടനം പുറത്തെടുത്ത അനുരാഗ് വി.എസ്, സായ്ശ്രീ കെ.എസ് എന്നിവർ സ്കൂളിന്റെ അഭിമാനതാരങ്ങളായി.എൽ.പി. കിഡ്ഡീസ് ആൺകുട്ടികളുടെ വിഭാഗത്തിൽ 50 മീറ്റർ, 100 മീറ്റർ ഓട്ടമത്സരങ്ങളിൽ അനുരാഗ് വി.എസ് ഒന്നാം സ്ഥാനം നേടി. പെൺകുട്ടികളുടെ വിഭാഗത്തിൽ 50 മീറ്റർ, 100 മീറ്റർ മത്സരങ്ങളിൽ ഒന്നാം സ്ഥാനവും ലോങ് ജമ്പിൽ മൂന്നാം സ്ഥാനവും കരസ്ഥമാക്കിയാണ് സായ്ശ്രീ കെ.എസ് മികച്ച വിജയം കൊയ്തത്.
വിജയികളായ കായിക പ്രതിഭകളെ കടവല്ലൂർ ഗ്രാമപഞ്ചായത്തിന്റെയും അധ്യാപകരുടെയും രക്ഷിതാക്കളുടെയും നേതൃത്വത്തിൽ സ്കൂൾ അങ്കണത്തിൽ സംഘടിപ്പിച്ച ചടങ്ങിൽ ആദരിച്ചു. ഗ്രാമപഞ്ചായത്ത് പ്രസിഡന്റ് ബിന്ദു ധർമ്മൻ ചടങ്ങ് ഉദ്ഘാടനം ചെയ്തു. പി.ടി.എ പ്രസിഡന്റ് എം.എ. അഭിലാഷ് അധ്യക്ഷത വഹിച്ച ചടങ്ങിൽ സ്കൂൾ എച്ച്.എം. ജിഷ ടീച്ചർ സ്വാഗതം ആശംസിച്ചു.
ഗ്രാമപഞ്ചായത്ത് വൈസ് പ്രസിഡന്റ് സലീം, വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ഹസീന അഷറഫ്, ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ പ്രഭാത് മുല്ലപ്പിള്ളി, വാർഡ് മെമ്പർ രേഷ്മ, പി.ടി.എ വൈസ് പ്രസിഡന്റ് ഫസലു, എം.പി.ടി.എ പ്രസിഡന്റ് സബിത, സ്കൂൾ സീനിയർ അധ്യാപിക പാർവ്വതി ടീച്ചർ എന്നിവർ ചടങ്ങിൽ ആശംസകൾ നേർന്നു സംസാരിച്ചു. ശബ്ന ടീച്ചർ നന്ദി രേഖപ്പെടുത്തി.
അനുമോദന ചടങ്ങിനു ശേഷം വാദ്യമേളങ്ങളുടെ അകമ്പടിയോടെ സ്കൂൾ അങ്കണത്തിൽ നിന്നും കൊരട്ടിക്കര സെന്ററിലേക്ക് കുട്ടികളെയും കൊണ്ട് വർണ്ണാഭമായ റാലിയും സംഘടിപ്പിച്ചു.
