എടപ്പാൾ : നാടകഅരങ്ങ് ഫൗണ്ടേഷൻ സംഘടിപ്പിക്കുന്ന 17-ാമത് അഖില കേരള പ്രൊഫഷണൽ നാടകമേളയ്ക്ക് നവംബർ 22ന് തുടക്കമാകും. 25 വരെ എടപ്പാൾ ഇടശ്ശേരി തിയേറ്ററിൽ (വള്ളത്തോൾ കോളേജ്) നടക്കുന്ന മേളയിൽ നാല് നാടകങ്ങൾ അരങ്ങേറും. ഉദ്ഘാടന സമ്മേളനം, പുരസ്കാര സമർപ്പണം, അനുസ്മരണം, കവിയരങ്ങ്, ആദരിക്കൽ, അനുമോദനം, പുസ്തകമേള എന്നിവയും മേളയുടെ ഭാഗമായി നടക്കും.നവംബർ 22ന് വൈകിട്ട് ആറിന് കേരള ചലച്ചിത്ര അക്കാദമി അംഗം ആർ.എസ്. പണിക്കർ മേള ഉദ്ഘാടനം ചെയ്യും. ചടങ്ങിൽ നടൻ ശിവജി ഗുരുവായൂർ ഉപഹാര സമർപ്പണം നടത്തും. പൊന്നാനി ബ്ലോക്ക് പഞ്ചായത്ത് പ്രസിഡന്റ് അഡ്വ. ആർ. ഗായത്രി വിശിഷ്ടാതിഥിയാകും. വിവിധ മേഖലകളിൽ പുരസ്കാരം നേടിയ പരത്തുള്ളി രവീന്ദ്രൻ, ബക്കർ ക്രിയേറ്റീവ്, ദേവരാജൻ മാസ്റ്റർ ഗുരുവായൂർ എന്നിവർ മറുവാക്ക് അവതരിപ്പിക്കും. അന്നേദിവസം ഉർവശി തിയേറ്റേഴ്സിന്റെ ” കുമ്മാട്ടി ” നാടകം അരങ്ങേറും.23ന് സൂര്യകൃഷ്ണമൂർത്തി അനുസ്മരണം നടക്കും. സംഗീത നാടക അക്കാദമി വൈസ് ചെയർമാൻ പി.വി. ഹേമന്ത് കുമാർ അനുസ്മരണ പ്രഭാഷണം നടത്തും. അഡ്വ. ബീനമോൾ സി.പി., സുബൈദ എന്നിവർ സംസാരിക്കും. തുടർന്ന് ‘നവംബർ 23’ നാടകം അരങ്ങിലെത്തും.24ന് നടക്കുന്ന കവിയരങ്ങ് കവി ജയൻ നീലേശ്വരം ഉദ്ഘാടനം ചെയ്യും. ജില്ലയിലെ വിവിധ ഭാഗങ്ങളിൽ നിന്നുള്ള കവികൾ പങ്കെടുക്കും. തുടർന്ന് ‘ദൈവത്തിന്റെ കണ്ണ്’ നാടകം അവതരിപ്പിക്കും.25ന് നടക്കുന്ന സമാപന സമ്മേളനം സാഹിത്യകാരൻ ആലങ്കോട് ലീലാകൃഷ്ണൻ ഉദ്ഘാടനം ചെയ്യും. ചെണ്ടവാദ്യ വിദഗ്ധൻ ശുകപുരം രാധാകൃഷ്ണനെ ചടങ്ങിൽ ആദരിക്കും. പഠനത്തിൽ ഉന്നത വിജയം നേടിയ മെഡിക്കൽ വിദ്യാർഥി അരുൺ സിയെയും അനുമോദിക്കും. തുടർന്ന് ‘ലക്ഷ്മണരേഖ’ നാടകം അരങ്ങേറും.എല്ലാ ദിവസവും വൈകിട്ട് ആറിനാണ് പരിപാടികൾ ആരംഭിക്കുക. മേളയുടെ വിജയത്തിനായി സഹൃദയരുടെയും നാട്ടുകാരുടെയും സഹായസഹകരണങ്ങൾ ഫൗണ്ടേഷൻ അഭ്യർഥിച്ചു.









