എടപ്പാള്:യുവതലമുറയെ കാർന്നുതിന്നുന്ന ലഹരി വിപത്തിനെതിരെ പരമ്പരാഗത വാദ്യകലകളെ പ്രതിരോധത്തിന്റെ ആയുധമാക്കി സോപാനം സ്കൂൾ ഓഫ് പഞ്ചവാദ്യം വട്ടംകുളം കോളേജ് ഓഫ് അപ്ലൈഡ് സയൻസ് (IHRD) നാഷണൽ സർവീസ് സ്കീമിന്റെ (NSS Unit 02) പ്രത്യേക ക്ഷണപ്രകാരം കലാലയത്തിൽ സംഘടിപ്പിച്ച ‘ബീറ്റ് ദി ഡ്രഗ്’ (Beat The Drug) ലഹരിവിരുദ്ധ ബോധവൽക്കരണ പരിപാടിയിലാണ് സോപാനം സ്കൂൾ ഓഫ് പഞ്ചവാദ്യത്തിലെ കലാകാരന്മാർ താളബോധവൽക്കരണവുമായി അണിനിരന്നത്.കോളേജ് ഓപ്പൺ സ്റ്റേജിൽ വെച്ച് നടന്ന ചടങ്ങിൽ കോളേജ് പ്രിൻസിപ്പൽ അബ്ദുസമദ് പരിപാടിയുടെ ഔദ്യോഗിക ഉദ്ഘാടനം നിർവ്വഹിച്ചു. കമ്പ്യൂട്ടർ സയൻസ് വിഭാഗം മേധാവി ഗോപാലകൃഷ്ണൻ യു. കെ. അധ്യക്ഷത വഹിച്ച ചടങ്ങിൽ,എൻ.എസ്.എസ് പ്രോഗ്രാം ഓഫീസർ അശ്വതി ബി വിഷയാവതരണം നടത്തി. എക്സൈസ് വകുപ്പ് ഉദ്യോഗസ്ഥ ജ്യോതി ടി. കെ.കൊമേഴ്സ് വിഭാഗം മേധാവി സൂര്യ വി. എസ്., ഫിസിക്കൽ എഡ്യൂക്കേഷൻ വിഭാഗം മേധാവി ഹംസ കെ. എന്നിവർ ആശംസകൾ നേർന്നു സംസാരിച്ചു.
തുടർന്ന് ക്യാമ്പസിനെ ആവേശത്തിലാഴ്ത്തിക്കൊണ്ട് സോപാനം സ്കൂൾ ഓഫ് പഞ്ചവാദ്യം അധ്യാപകനായ കലാമണ്ഡലം മനീഷിന്റെ നേതൃത്വത്തിൽ ലഹരിക്കെതിരെയുള്ള പ്രത്യേക ഡെമോൺസ്ട്രേഷൻ ക്ലാസ്സ് നടന്നു.സോപാനം സ്കൂളിലെ സീനിയർ വിദ്യാർത്ഥിയും ഇതേ കോളേജിലെ അഞ്ചാം സെമസ്റ്റർ കമ്പ്യൂട്ടർ സയൻസ് വിദ്യാർത്ഥിയുമായ അഭിറാം എം.സോപാനത്തിലെ മറ്റ് വിദ്യാർത്ഥികൾ എന്നിവർ ചേർന്നാണ് ഡെമോൺസ്ട്രേഷൻ സെഷൻ കൈകാര്യം ചെയ്തത്.ലഹരിയുടെ വഴിയിലേക്ക് പോകാതെ, മനസ്സിനെ ഏകാഗ്രമാക്കാനും സർഗ്ഗാത്മകമാക്കാനും കലകൾക്ക് എങ്ങനെ സാധിക്കുമെന്ന് വാദ്യതാളങ്ങളുടെ അകമ്പടിയോടെ ഇവർ വിദ്യാർത്ഥികൾക്ക് കാണിച്ചു കൊടുത്തു.സോപാനത്തിലെ കലാകാരന്മാർ തീർത്ത താളലയങ്ങൾ ലഹരിവിരുദ്ധ സന്ദേശമായി കലാലയം ഏറ്റെടുത്തു.എൻ.എസ്.എസ് വോളന്റിയർ സിനാൻ നന്ദി രേഖപ്പെടുത്തിയ ചടങ്ങിൽ കോളേജിലെ അധ്യാപകരും വിദ്യാർത്ഥികളും ജീവനക്കാരും സജീവമായി പങ്കെടുത്തു.സാമൂഹിക പ്രതിബദ്ധതയുള്ള ഇത്തരം പ്രവർത്തനങ്ങളിൽ പങ്കാളികളാകാൻ കഴിഞ്ഞതിൽ അഭിമാനമുണ്ടെന്ന് സോപാനം സ്കൂൾ ഓഫ് പഞ്ചവാദ്യം ഭാരവാഹികൾ അറിയിച്ചു.
