കൊച്ചി: കാലടി സർവകലാശാല ക്യാമ്പസിന് മുന്നിൽ വിദ്യാർത്ഥികൾ നടത്തുന്ന നിരാഹാര സമരം 11-ാം ദിവസത്തിലേക്ക്. മൂന്ന് വിദ്യാ‌ർത്ഥികളാണ് നിരാഹാര സമരം നടത്തുന്നത്. പ്രതിപക്ഷ നേതാവ് പിണറായി വിജയൻ ഇന്ന് രാവിലെ സമരം ചെയ്യുന്ന വിദ്യാർത്ഥികളെ സന്ദർശിച്ച് ഐക്യദാർഢ്യം പ്രഖ്യാപിച്ചു.
സർവകലാശാല അധികൃതർ വിദ്യാർത്ഥികൾക്കെതിരെ പ്രതികാര മനോഭാവത്തോടെയാണ് പെരുമാറുന്നതെന്ന് പിണറായി വിജയൻ ആരോപിച്ചു. വൈസ് ചാൻസിലർ ആർഎസ്‌എസിന്റെ ഇഷ്‌ടതോഴിയായി പ്രവർത്തിക്കുകയാണ്. സമൂഹത്തിന് മുന്നിൽ പച്ചക്കള്ളങ്ങൾ അവതരിപ്പിക്കുകയാണെന്നും പിണറായി കുറ്റപ്പെടുത്തി. ‘ലൈറ്റ് മരിച്ചേ’ നാടകവുമായി ബന്ധപ്പെട്ട ഇപ്പോഴത്തെ വിവാദങ്ങൾ വിസിയും മുൻ ഗവർണറും ചേർന്ന് നടത്തിയ ഗൂഢാലോചനയുടെ ഭാഗമാണ്. ജനാധിപത്യം സംരക്ഷിക്കാൻ തെറ്റുകളെ ചോദ്യം ചെയ്യുന്ന വിദ്യാർത്ഥികളെ കേന്ദ്ര സർക്കാർ അടിച്ചമർത്താൻ ശ്രമിക്കുകയാണെന്നും പിണറായി വിജയൻ വിമർശിച്ചു.
അതേസമയം, പരീക്ഷ എഴുതാൻ അനുവദിക്കണമെന്നാവശ്യപ്പെട്ട് കാലടി സർവകലാശാലയിലെ വിദ്യാർത്ഥികൾ സമർപ്പിച്ച ഹർജി പരിഗണിക്കുന്നത് ഹൈക്കോടതി തിങ്കളാഴ്‌ചത്തേക്ക് മാറ്റി. വിദ്യാർത്ഥികൾ കുറ്റക്കാരാണെന്നും പരീക്ഷയെഴുതാൻ അർഹതയില്ലെന്നുമാണ് സർവകലാശാല ഇന്നലെ കോടതിയിൽ സമർപ്പിച്ച സത്യവാങ്‌മൂലത്തിൽ പറയുന്നത്. ഇതിന്മേൽ വിദ്യാർത്ഥികൾക്ക് മറുപടി നൽകാനുള്ള സാവകാശം പരിഗണിച്ചാണ് ഹർജി പരിഗണിക്കുന്നത് തിങ്കളാഴ്‌ചത്തേക്ക് മാറ്റിയത്.
നേരത്തെ കേസ് പരിഗണിക്കവെ ഇന്ന് തന്നെ വിധിപ്രസ്‌താവനം നടത്തുമെന്നും കേസ് നീട്ടികൊണ്ടുപോകില്ലെന്നും ജസ്റ്റിസ് പി വി കുഞ്ഞികൃഷ്‌ണൻ അദ്ധ്യക്ഷനായ സിംഗിൾ ബെഞ്ച് പറഞ്ഞിരുന്നു. എന്നാൽ, ഇന്നലെ വൈകുന്നേരത്തോടെ വിദ്യാർത്ഥികൾക്കെതിരായി സർവകലാശാല സത്യവാങ്മൂലം നൽകിയതോടെയാണ് കേസ് പരിഗണിക്കുന്നത് നീട്ടിയത്.
