പഞ്ചാബ്: നിയമസഭാ തിരഞ്ഞെടുപ്പിന് മുന്നേ ആം ആദ്മി പാര്‍ട്ടിക്ക് തിരിച്ചടി. പാര്‍ട്ടി വിട്ട മൂന്ന് എംഎല്‍എമാര്‍ ബിജെപിയില്‍ ചേര്‍ന്നു. ഡല്‍ഹിയില്‍ ബിജെപി ആസ്ഥാനത്ത് എത്തി അംഗത്വം സ്വീകരിച്ചു. തിരഞ്ഞെടുപ്പില്‍ സീറ്റ് നിഷേധിച്ചതിന് തുടര്‍ന്നാണ് നേതാക്കള്‍ പാര്‍ട്ടി വിട്ടത്. പഞ്ചാബ് നിയമസഭ തിരഞ്ഞെടുപ്പിനായി ആദ്യഘട്ടത്തില്‍ 40 സ്ഥാനാര്‍ഥികളെ പ്രഖ്യാപിച്ച ആംആദ്മി പാര്‍ട്ടിക്ക് തൊട്ടടുത്ത ദിവസം തന്നെയാണ് ഇത്തരമൊരു തിരിച്ചടി നേരിടേണ്ടി വന്നത്. സനൗര്‍ എംഎല്‍എ ഹര്‍മീത് സിങ് പഠാന്‍മജ്ര, സമാന എംഎല്‍എ ചേതന്‍ സിങ് ജൗരമജ്ര, അമൃത്സര്‍ നോര്‍ത്ത് എംഎല്‍എയും മുന്‍ ഐപിഎസ് ഉദ്യോഗസ്ഥനായ കുന്‍വര്‍ വിജയ് പ്രതാപ് സിംഗ് എന്നിവരാണ് സീറ്റ് നിഷേധിച്ചതിന്റെ പേരില്‍ പാര്‍ട്ടി വിട്ടത്.
നേരത്തെ, തന്നെ പാര്‍ട്ടി നേതൃത്വവുമായി ഇവര്‍ മൂന്നുപേരും തര്‍ക്കത്തില്‍ ആയിരുന്നു. ഒടുവില്‍ സീറ്റ് നിഷേധിച്ചതോടെ അതൃപ്തി പരസ്യമാക്കി നേതാക്കള്‍ ആംആദ്മി പാര്‍ട്ടി വിടുകയായിരുന്നു. ആം ആദ്മി പാര്‍ട്ടിയില്‍ ചേര്‍ന്ന മുന്‍ ശിരോമണി അകാലിദള്‍ നേതാവ് സുര്‍ജിത് സിങ് രഖ്‌റയ്ക്ക് സമാന മണ്ഡലത്തിലെ പാര്‍ട്ടി പ്രവര്‍ത്തനങ്ങളുടെ നിര്‍ണായക ചുമതല നല്‍കിയതാണ് ചേതന്‍ സിങ് ജൗരമജ്രയുടെ അതൃപ്തിക്ക് പിന്നില്‍.
ബിജെപി അംഗത്വം സ്വീകരിച്ച ആംആദ്മി പാര്‍ട്ടി നേതാക്കള്‍ പഞ്ചാബ് സര്‍ക്കാരിനെതിരെ ആഞ്ഞടിച്ചു. ക്രിമിനലുകളും ഗുണ്ടകളും ആണ് സര്‍ക്കാര്‍ സ്ഥാപനങ്ങള്‍ നിയന്ത്രിക്കുന്നത് എന്ന് ആരോപിച്ചു. തിരഞ്ഞെടുപ്പിന് മുന്‍പ് കൂടുതല്‍ ആംആദ്മി പാര്‍ട്ടി നേതാക്കള്‍ പാര്‍ട്ടി വിടും എന്നാണ് ബിജെപി കേന്ദ്രങ്ങള്‍ അറിയിക്കുന്നത്.
