ഗുരുവായൂർ ദേവസ്വത്തിന് കീഴിലുള്ള മേൽപ്പത്തൂർ ഓഡിറ്റോറിയത്തിന്റെയും ഗുരുവായൂർ ഓഡിറ്റോറിയത്തിന്റെയും വാടക ഇരട്ടിയാക്കി. പുതിയ നിരക്കനുസരിച്ച് ഒരു മണിക്കൂറിന് 11,800 രൂപ നൽകണം. കഴിഞ്ഞ ദിവസം ചേർന്ന ദേവസ്വം ഭരണസമിതിയുടേതാണ് തീരുമാനം.
നിലവിൽ ജിഎസ്ടി ഉൾപ്പെടെ 5,900 രൂപയായിരുന്നു ഒരു മണിക്കൂറിന്റെ വാടക. പുതിയ നിരക്ക് ജനുവരി ഒന്നുമുതൽ പ്രാബല്യത്തിൽ വരും. ഒരുമണിക്കൂർ വീതമുള്ള സ്ലോട്ടുകളായാണ് ഓഡിറ്റോറിയങ്ങളുടെ വാടക നിശ്ചയിക്കുന്നത്. ഇതനുസരിച്ച് ഒരു ദിവസത്തെ മുഴുവൻ സ്ലോട്ടുകൾക്ക് 1.60 ലക്ഷം രൂപ ചെലവാകും.
ഓഡിറ്റോറിയങ്ങൾ 60 ദിവസം മുൻപ് ബുക്ക് ചെയ്യണമെന്നതിനാൽ ജനുവരിയിലെ ചടങ്ങുകൾക്കുള്ള ബുക്കിങ് ഇപ്പോൾ തന്നെ നടത്തണം. സ്ലോട്ട് ലഭിക്കുന്നതിന് നേരിട്ടെത്തി അപേക്ഷ സമർപ്പിക്കണം. ഒരേ സ്ലോട്ടിനായി ഒന്നിലധികം അപേക്ഷകൾ ലഭിച്ചാൽ നറുക്കെടുപ്പിലൂടെയാകും അർഹരെ തിരഞ്ഞെടുക്കുക.
