നിള സംഗ്രഹാലയം ഉദ്ഘാടനം 21ന് നടക്കും

പൊന്നാനി: നിളയോരപാതയില്‍ നിര്‍മ്മിച്ച നിള സംഗ്രഹാലയം ഫെബ്രുവരി 21 ശനിയാഴ്ച വൈകീട്ട് 7.30ന് ഉദ്ഘാടനം ചെയ്യും. പൊന്നാനി എം.എല്‍.എ പി. നന്ദകുമാര്‍ അധ്യക്ഷത വഹിക്കുന്ന ചടങ്ങില്‍ പൊതുമരാമത്ത്-ടൂറിസം വകുപ്പ് മന്ത്രി പി.എ. മുഹമ്മദ് റിയാസ് ഉദ്ഘാടനം നിര്‍വഹിക്കും.
ഭാരതപ്പുഴയുടെ തീരത്ത് ഇന്‍ഡോ-ഡച്ച് വാസ്തു മാതൃകയില്‍ നിര്‍മ്മിച്ച മ്യൂസിയം പൊന്നാനിക്കളരിയും കേരളചരിത്രവും ഉള്‍ക്കൊള്ളുന്ന സാംസ്‌കാരിക കേന്ദ്രമാണ്. പതിനേഴായിരം ചതുരശ്ര അടിയോളം വിസ്തീര്‍ണ്ണമുള്ള മ്യൂസിയം ഇന്ത്യയിലെ ആദ്യത്തെ ‘ബ്ലൈന്റ് ഫ്രണ്ട്‌ലി’ മ്യൂസിയമായി സജ്ജീകരിച്ചിരിക്കുന്നു.
പൊന്നാനിയുടെ ചരിത്രം, സാഹിത്യ പാരമ്പര്യം, നാവികബന്ധങ്ങള്‍, മാമാങ്കം ഉള്‍പ്പെടെയുള്ള പൈതൃകങ്ങള്‍ ഉള്‍ക്കൊള്ളുന്ന കാഴ്ചകള്‍ ഇവിടെ ഒരുക്കിയിട്ടുണ്ട്. വിദ്യാര്‍ത്ഥികള്‍ക്കും ഗവേഷകര്‍ക്കും സഞ്ചാരികള്‍ക്കും പ്രാധാന്യമുള്ള കേന്ദ്രമായി നിള സംഗ്രഹാലയം മാറുമെന്നാണ് പ്രതീക്ഷ.