പൊന്നാനി: മണ്ഡലത്തിന്റെ സമഗ്രവും സുസ്ഥിരവുമായ വികസനം ലക്ഷ്യമിട്ട് കെ.പി. നൗഷാദ് അലി എം.എൽ.എയുടെ നേതൃത്വത്തിൽ ‘ചക് ദേ പൊന്നാനി’ വികസന പദ്ധതിക്ക് തുടക്കമാകുന്നു. ജനങ്ങളുടെ നേരിട്ടുള്ള പങ്കാളിത്തത്തോടെ അടിത്തട്ടിൽ നിന്ന് വികസനം ഉറപ്പാക്കുകയാണ് പദ്ധതിയുടെ പ്രധാന ലക്ഷ്യം.
മണ്ഡലത്തിലെ 180 വാർഡുകളിലും എൻ.എസ്.എസ്. വിദ്യാർഥികൾ, ആശാ വർക്കർമാർ, അങ്കണവാടി അധ്യാപകർ എന്നിവരുടെ സേവനം ഉപയോഗപ്പെടുത്തി വിപുലമായ സർവേ നടത്തും. ഇതിലൂടെ ലഭിക്കുന്ന ജനങ്ങളുടെ യഥാർത്ഥ ആവശ്യങ്ങൾ ഡിജിറ്റൽ ഡാഷ്‌ബോർഡിലൂടെ ഏകോപിപ്പിച്ച് കൃത്യമായ സമയബന്ധിതമായി നടപ്പാക്കും.
- ആരോഗ്യ രംഗം: മണ്ഡലത്തിൽ പുതിയ ഡയാലിസിസ് സെന്റർ, ന്യൂറോ റിഹാബിലിറ്റേഷൻ സെന്റർ, കുട്ടികൾക്കായുള്ള ഏർലി ഇന്റർവെൻഷൻ സെന്റർ എന്നിവ സ്ഥാപിക്കും. കുട്ടികളിലെ വൈകല്യങ്ങൾ നേരത്തേ കണ്ടെത്തി ചികിത്സ ഉറപ്പാക്കാനും ഭിന്നശേഷിക്കാർക്ക് പ്രത്യേക സഹായങ്ങൾ ലഭ്യമാക്കാനും പദ്ധതിയുണ്ട്.
- വിദ്യാഭ്യാസം & തൊഴിൽ:
തീരദേശ വിദ്യാർഥികൾക്കായി പ്രത്യേക സ്കോളർഷിപ്പുകൾ ഏർപ്പെടുത്തും. കൂടാതെ, പഠനം പാതിവഴിയിൽ ഉപേക്ഷിച്ച 640-ഓളം വിദ്യാർഥികളെ ഡിജിറ്റൽ സാക്ഷരതയും തൊഴിൽപരിശീലനവും നൽകി മുഖ്യധാരയിലേക്ക് കൊണ്ട് വരാനും പദ്ധതി ലക്ഷ്യമിടുന്നു.
ജനകീയ പങ്കാളിത്തത്തോടെ നടപ്പാക്കുന്ന ഈ മാതൃകാപരമായ വികസന പദ്ധതി പൊന്നാനിയുടെ മുഖച്ഛായ തന്നെ മാറ്റുമെന്നാണ് പ്രതീക്ഷിക്കുന്നത്.
