ചങ്ങരംകുളം:സംസ്ഥാന പാതയോരത്ത് സ്വകാര്യ വ്യക്തികളുടെ കൂട്ടുടമസ്ഥതയിലുള്ള സ്ഥലത്തിന് മുന്നിൽ പ്രവർത്തിച്ചിരുന്ന മിനി ലോറി / ലോറി സ്റ്റാൻഡ്, സൈൻ ബോർഡ്, പാർക്കിംഗ് എന്നിവ ഹൈക്കോടതി ഉത്തരവ് പ്രകാരം പൊതുമരാമത്ത് വകുപ്പും പോലീസും ചേർന്ന് പൊളിച്ചു മാറ്റി.നേരത്തെ പൊതുമരാമത്ത് വകുപ്പ് സ്റ്റാൻഡ് മാറ്റണമെന്ന് ആവശ്യപ്പെട്ട് കത്ത് നൽകുകയും സ്റ്റാൻഡ് പൊളിച്ചുനീക്കുകയും ചെയ്തിരുന്നെങ്കിലും സ്റ്റാൻഡ് ഒഴിപ്പിക്കാനെത്തിയ ഉദ്യോഗസ്ഥരെ ഡ്രൈവർമാര്‍ തടഞ്ഞത് തർക്കങ്ങൾക്കും വാക്കേറ്റങ്ങള്‍ക്കും ഇടയാക്കിയിരുന്നു.
എന്നാല്‍ ഇരിപ്പിടങ്ങളും ബോര്‍ഡും മാറ്റാതെ വരികയും വാഹനങ്ങള്‍ പാര്‍ക്ക് ചെയ്യുന്നത് തുടരുകയും ചെയ്തതോടെയാണ് സ്ഥലത്തിന്റെ ഉടമകള്‍ വീണ്ടും ഹൈകോടതിയെ സമീപിച്ചത്.ഉടമകളായ കുളങ്ങരവളപ്പില്‍ നാരായണന്‍,പാറുക്കുട്ടി,നന്ദകുമാര്‍,ദിലീപ്കുമാര്‍,ഷീജ എന്നിവര്‍ ആണ് ഹൈകോടതിയെ സമീപിച്ചത്.തുടർന്ന് കോടതി പിഴത്തുക മിനി ലോറി / ലോറി ഡ്രൈവർമാരിൽ നിന്ന് ഈടാക്കാനും സ്റ്റാൻഡ് പൂർണ്ണമായും ഒഴിപ്പിക്കാനും പൊതുമരാമത്ത് വകുപ്പിനും പോലീസിനും നിർദേശം നൽകുകയുമായിരുന്നു.
