ആനക്കര: താൽക്കാലിക നിയമനവുമായി ബന്ധപ്പെട്ട തർക്കത്തെത്തുടർന്നുണ്ടായ മുന്നണി ഭിന്നതയ്ക്കൊടുവിൽ ആനക്കര ഗ്രാമപഞ്ചായത്തിൽ UDFന് ഭരണം നഷ്ടമായി. പ്രസിഡന്റിനെതിരെ LDF കൊണ്ടുവന്ന അവിശ്വാസ പ്രമേയം മുസ്‌ലിം ലീഗിന്റെ പിന്തുണയോടെ പാസായി.വെള്ളിയാഴ്ച രാവിലെ 11ന് ചേർന്ന പഞ്ചായത്ത് കൗൺസിൽ യോഗത്തിലാണ് അവിശ്വാസ പ്രമേയം പാസായത്. 17 അംഗ പഞ്ചായത്തിൽ LDFന് ഏഴും കോൺഗ്രസിന് ആറും മുസ്‌ലിം ലീഗിന് മൂന്നും ബിജെപിക്ക് ഒന്നും അംഗങ്ങളാണുള്ളത്.LDFന്റെ ഏഴ് അംഗങ്ങൾക്കൊപ്പം മുസ്‌ലിം ലീഗിന്റെ മൂന്ന് അംഗങ്ങളും അവിശ്വാസ പ്രമേയത്തെ അനുകൂലിച്ച് വോട്ട് ചെയ്തു. ഇതോടെ 10 അംഗങ്ങളുടെ പിന്തുണയോടെ പ്രമേയം പാസായി.
യുഡിഎഫിന്റെ ഭാഗമായ ലീഗ് അംഗങ്ങൾ അവിശ്വാസത്തെ പിന്തുണച്ചത് പഞ്ചായത്തിലെ ഭരണസമവാക്യത്തിൽ നിർണായകമായി.താൽക്കാലിക നിയമനവുമായി ബന്ധപ്പെട്ട തർക്കമാണ് യുഡിഎഫിനുള്ളിലെ ഭിന്നതയ്ക്ക് കാരണമായത്. പുതിയ പഞ്ചായത്ത് പ്രസിഡന്റിനെ തിരഞ്ഞെടുക്കുന്നതിനുള്ള നടപടികൾ വരും ദിവസങ്ങളിൽ ഉണ്ടാകും.
