തിരൂർ: സ്ത്രീപീഡനക്കേസിൽ പ്രതിയായ ഏഴൂർ സ്വദേശിയെ മുംബൈയിൽ നിന്ന് തിരൂർ പൊലീസ് പിടികൂടി. കളത്തിൽ ശരത്ത് (37) ആണ് പിടിയിലായത്.2023 സെപ്റ്റംബറിലാണ് കേസിനാസ്പദമായ സംഭവം നടന്നതും തിരൂർ പൊലീസ് കേസെടുത്തതും. സംഭവത്തിന് ശേഷം വിദേശത്തേക്ക് കടന്ന പ്രതി, മുംബൈ അന്താരാഷ്ട്ര വിമാനത്താവളത്തിൽ എത്തിയിട്ടുണ്ടെന്ന വിവരത്തിന്റെ അടിസ്ഥാനത്തിലാണ് പൊലീസ് സംഘം അവിടെയെത്തി കസ്റ്റഡിയിലെടുത്തത്. പ്രതിയെ തിരൂരിലെത്തിച്ച് കോടതിയിൽ ഹാജരാക്കി റിമാൻഡ് ചെയ്തു.
പൊലീസ് വാഹനത്തിൽ കിലോമീറ്ററോളം യാത്ര ചെയ്താണ് സംഘം മുംബൈയിലെത്തി പ്രതിയെ വലയിലാക്കിയത്. തിരൂർ സ്റ്റേഷൻ ഇൻസ്പെക്ടർ ജലീൽ കറുത്തേടത്തിന്റെ നിർദേശപ്രകാരം സബ് ഇൻസ്പെക്ടർ നസീർ തിരൂർക്കാട്, സിവിൽ പൊലീസ് ഓഫീസർമാരായ അനീഷ്, ജൗഹർ എന്നിവരടങ്ങിയ സംഘമാണ് കേസിന്റെ തുടർനടപടികൾ സ്വീകരിച്ചതും പ്രതിയെ അറസ്റ്റ് ചെയ്തതും.
