ആദ്യദിനം നേടിയത് 60 കോടി; വന്‍ അഭിപ്രായം, കളക്ഷനില്‍ കസറി ‘കാന്താര’

ഋഷഭ് ഷെട്ടി രചന നിര്‍വഹിച്ച് സംവിധാനംചെയ്ത ‘കാന്താര’യുടെ പ്രീക്വല്‍ ആയ ‘കാന്താര ചാപ്റ്റര്‍ 1’ വ്യാഴാഴ്ചയാണ് പ്രദര്‍ശനത്തിനെത്തിയത്. എല്ലാ ഭാഷകളില്‍ നിന്നുമായി ചിത്രം 60 കോടി രൂപ നേടിയെന്ന വിവരമാണിപ്പോള്‍ പുറത്തുവരുന്നത്. ട്രേഡ് ട്രാക്കറായ സക്‌നില്‍ക്കിന്റെ ആദ്യ കണക്കുകള്‍ പ്രകാരമാണിത്. സക്‌നില്‍ക്കിന്റെ കണക്കനുസരിച്ച്, ഹിന്ദിയില്‍ നിന്ന് ഏകദേശം 19-21 കോടി രൂപ ചിത്രം നേടിയിട്ടുണ്ട്. ഈ വര്‍ഷത്തെ ഇതുവരെയുള്ള ഏറ്റവും വലിയ ഫെസ്റ്റിവല്‍ റിലീസായാണ് ‘കാന്താര ചാപ്റ്റര്‍ 1’നെ വിശേഷിപ്പിക്കുന്നത്. ബോക്‌സ് ഓഫീസില്‍ ധര്‍മ പ്രൊഡക്ഷന്‍സിന്റെ ‘സണ്ണി സന്‍സ്‌കാരി കി തുളസി കുമാരി’യുമായി ഈ കന്നഡ ചിത്രം ഏറ്റുമുട്ടി. വരുണ്‍ ധവാന്‍, ജാന്‍വി കപൂര്‍, രോഹിത് സറഫ്, സന്യ മല്‍ഹോത്ര എന്നിവര്‍ പ്രധാന വേഷങ്ങളിലെത്തിയ ഈ ചിത്രം 9.25 കോടി രൂപയാണ് നേടിയത്. യഷിന്റെ ‘കെജിഎഫ്: ചാപ്റ്റര്‍ 2’-ന് ശേഷം ഹിന്ദി വിപണിയില്‍ ഒരു കന്നഡ സിനിമയ്ക്ക് ലഭിക്കുന്ന രണ്ടാമത്തെ ഏറ്റവും വലിയ ഓപ്പണിങ്ങാണ് ഋഷഭ് ഷെട്ടി ചിത്രത്തിന് ലഭിച്ചത്. കെജിഎഫ് 54 കോടി രൂപയാണ് നേടിയത്. 125 കോടി രൂപ ബഡ്ജറ്റില്‍ നിര്‍മിച്ച ഋഷഭ് ഷെട്ടിയുടെ ഈ സംവിധാന സംരംഭത്തിന്റെ ആദ്യദിന കളക്ഷന്‍ ചിത്രത്തിന് പ്രതീക്ഷ നല്‍കുന്നുണ്ട്.
ഋഷഭ് ഷെട്ടി, ജയറാം, രുക്മിണി വസന്ത്, ഗുല്‍ഷന്‍ ദേവയ്യ എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. 2024-ല്‍ ‘കാന്താര’യിലെ അഭിനയത്തിന് ഋഷഭ് ഷെട്ടിക്ക് മികച്ച നടനുള്ള ദേശീയ പുരസ്‌കാരം ലഭിച്ചിരുന്നു. മികച്ച ജനപ്രിയ ചിത്രത്തിനുള്ള ദേശീയ പുരസ്‌കാരവും ഈ ചിത്രം നേടി.