മുസ്‌ലിം പള്ളികളും ദർഗകളും ബിജെപി ഇടിച്ചുനിരത്തുന്നു; മൗനം പാലിക്കുന്നത് വലിയ പാതകമെന്ന് കെ.പി. നൗഷാദ് അലി എംഎൽഎ

ബിജെപി ഭരിക്കുന്ന ഇന്ത്യൻ സംസ്ഥാനങ്ങളുടെ പ്രധാന അജണ്ട മുസ്‌ലിം പള്ളികളും ദർഗകളും ബുൾഡോസർ ഉപയോഗിച്ച് തകർക്കലാണെന്ന് കെ.പി. നൗഷാദ് അലി എംഎൽഎ ആരോപിച്ചു. നൂറ്റാണ്ടുകൾ പഴക്കമുള്ള പൈതൃക മന്ദിരങ്ങൾ വികലമാക്കുന്ന നടപടികളാണ് ഇത്തരം സംസ്ഥാനങ്ങളിൽ തുടർച്ചയായി നടക്കുന്നത്. ഇതിന്റെ ഏറ്റവും ഒടുവിലത്തെ ഉദാഹരണമാണ് ഉജ്ജയിനിലെ ഷാഹി മസ്ജിദ് തകർത്ത സംഭവമെന്ന് ഫേസ്ബുക്ക് കുറിപ്പിൽ അദ്ദേഹം ചൂണ്ടിക്കാട്ടി.
ഫാസിസം ജെസിബിയുടെ രൂപത്തിൽ വിദ്വേഷ ഉന്മാദം നടത്തുമ്പോൾ, ചോർന്നുപോകുന്നത് സഹസ്രാബ്ദങ്ങളുടെ പഴക്കമുള്ള ഭാരതീയ രാഷ്ട്ര സംസ്കൃതിയാണെന്ന് അദ്ദേഹം കുറിച്ചു. ന്യൂനപക്ഷങ്ങളുടെ ആരാധനാലയങ്ങളും ഭവനങ്ങളും ഇടിച്ചുനിരത്തി അധികാരം നിലനിർത്താൻ ശ്രമിക്കുന്നവർക്കെതിരെ മൗനം പാലിക്കുന്നത് ജനാധിപത്യത്തോടുള്ള വലിയ പാതകമാണ്.
ഭരണകൂട അനീതികൾക്കെതിരെ കോൺഗ്രസിന്റെ നേതൃത്വത്തിൽ ജനമനസാക്ഷി ഉണരേണ്ടതുണ്ടെന്നും, “ഇപ്പോഴല്ലെങ്കിൽ പിന്നെ എപ്പോഴാണ് രാഷ്ട്ര മനസാക്ഷി ഉണരുക” എന്നും കെ.പി. നൗഷാദ് അലി ഫേസ്ബുക്ക് പോസ്റ്റിലൂടെ ചോദിച്ചു.