നായയെ കണ്ട് പേടിച്ചോടിയ കുട്ടി കുളത്തിൽ വീണു, രക്ഷിക്കാനിറങ്ങിയ മുത്തശ്ശിക്ക് ദാരുണാന്ത്യം

ചിറ്റൂരിൽ കുളത്തിൽ വീണ ചെറുമകളെ രക്ഷിക്കാൻ ശ്രമിക്കുന്നതിനിടെ മുത്തശ്ശി മുങ്ങിമരിച്ചു. വണ്ടിത്താവളം സ്വദേശി നബീസയാണ് (55) മരിച്ചത്. നായ ആക്രമിക്കാൻ വരുന്നതിനിടെ ഓടി രക്ഷപ്പെടാൻ ശ്രമിച്ചപ്പോഴാണ് ചെറുമകളായ ഷിഫാന കുളത്തിൽ വീണത്. ഇന്നലെ വൈകിട്ട് അഞ്ച് മണിയോടെയായിരുന്നു അപകടം.ആടിനെ മേയ്ക്കാൻ വണ്ടിത്താവളം വടതോട് കുളത്തിനടുത്തെത്തിയതായിരുന്നു നബീസ. അപ്പോഴാണ് ഷിഫാനയെ നായ ഓടിക്കുന്നത് നബീസ കണ്ടത്. നായയിൽ നിന്ന് രക്ഷപ്പെടാൻ ശ്രമിക്കുന്നതിനിടെ കുട്ടി കാൽവഴുതി കുളത്തിലേക്ക് വീഴുകയായിരുന്നു. കുട്ടിയെ രക്ഷപ്പെടുത്താൻ തിടുക്കപ്പെട്ടിറങ്ങിയ നബീസ കുളത്തിൽ മുങ്ങി താഴുകയായിരുന്നുവെന്ന് പൊലീസ് അറിയിച്ചു. ഇവരെ കുളത്തിൽ നിന്നും പുറത്തെടുത്ത് ചിറ്റൂർ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഷിഫാന ജില്ലാ ആശുപത്രിയിൽ ചികിത്സയിലാണ്.