കൊച്ചി: സ്വര്‍ണവിലയില്‍ വര്‍ധന. ഗ്രാമിന് 60 രൂപയുടെ വര്‍ധനയാണ് ഇന്നുണ്ടായത്. ഒരു ഗ്രാം സ്വര്‍ണത്തിന്റെ വില 13,195 രൂപയായി ഉയര്‍ന്നു. പവന്റെ വിലയില്‍ 480 രൂപയുടെ വര്‍ധനയുണ്ടായിട്ടുണ്ട്. പവന്റെ വില 1,05, 560 രൂപയായി ഉയര്‍ന്നു. 18 കാരറ്റ് സ്വര്‍ണത്തിന്റെ വില ഗ്രാമിന് 50 രൂപയും പവന് 400 രൂപയും കൂടി. യഥാക്രമം ഗ്രാമിന് 10,800 രൂപയായും പവന് 86,400 രൂപയായുമാണ് വില ഉയര്‍ന്നത്.
രാജ്യാന്തര വിപണിയിലും സ്വര്‍ണത്തിന് വില ഉയര്‍ന്നിട്ടുണ്ട്. ഒരു ശതമാനം നേട്ടമാണ് ഉണ്ടായത്. സ്‌പോട്ട് ഗോള്‍ഡ് 4,061.86 ഡോളറിലാണ് വ്യാപാരം നടത്തുന്നത്. യുഎസ് ഗോള്‍ഡ് ഫ്യൂച്ചറിന്റെ ഡിസംബര്‍ ഡെലിവറി 4,075.60 ഡോളറിലെത്തി.
സ്വര്‍ണവിപണിയെ സംബന്ധിച്ചടുത്തോളം ഫെഡറല്‍ റിസര്‍വിന്റെ വായ്പനയം നിര്‍ണായകമാണ്. പണപ്പെരുപ്പം രണ്ട് ശതമാനമെന്ന ലക്ഷ്യത്തിനുള്ളില്‍ നിര്‍ത്താനാണ് ഫെഡ് ലക്ഷ്യമിടുന്നത്. പണപ്പെരുപ്പം ലക്ഷ്യത്തില്‍ നില്‍ക്കാത്തതിനാല്‍ ഫെഡറല്‍ റിസര്‍വ് പലിശനിരക്ക് ഉയര്‍ത്തുമോയെന്നാണ് എല്ലാവരും ഉറ്റുനോക്കുന്നത്.ഫെഡറല്‍ റിസര്‍വ് ഇത്തവണ നിരക്ക് ഉയര്‍ത്താതെ തല്‍സ്ഥിതി തുടരുമെന്നാണ് ചില സാമ്പത്തികവിദഗ്ധരുടെ വിലയിരുത്തല്‍.
