എരമംഗലം: നരണിപ്പുഴ–കുമ്മിപ്പാലം കോൾപടവിലെ അടിസ്ഥാനസൗകര്യ വികസന പദ്ധതികൾ യാഥാർഥ്യത്തിലേക്ക്. പാടശേഖരസമിതി സമർപ്പിച്ച വിവിധ വികസന നിർദേശങ്ങൾ നേരിട്ട് പരിശോധിച്ച് എസ്റ്റിമേറ്റ് തയ്യാറാക്കുന്നതിനായി കെ.എൽ.ഡി.സി (KLDC) ഉദ്യോഗസ്ഥർ പാടശേഖരത്തിൽ സന്ദർശനം നടത്തി.പൊന്നാനി എം.എൽ.എ കെ.പി. നൗഷാദ് അലിയുടെ നേതൃത്വത്തിൽ പെരുമ്പടപ്പ് ബ്ലോക്ക് പഞ്ചായത്തിലെ എരമംഗലം ഡിവിഷനിലെ ജനപ്രതിനിധികളെയും പാടശേഖരസമിതി അംഗങ്ങളെയും പങ്കെടുപ്പിച്ച് യോഗം ചേർന്നിരുന്നു. ഈ യോഗത്തിൽ ഉയർന്നുവന്ന വികസന ആവശ്യങ്ങൾ വിലയിരുത്തുന്നതിനാണ് ഉദ്യോഗസ്ഥ സംഘം കോൾപടവുകളിലെത്തിയത്.
താഴ്ന്നുപോയ ബണ്ടുകളുടെ അറ്റകുറ്റപ്പണി, രണ്ട് എൻജിൻ ഷെഡുകളും എൻജിൻ തറയും അഞ്ച് സ്ലൂയിസുകളും നിർമിക്കൽ, എട്ട് കിടകളും രണ്ട് ലീഡ് ചാനലുകളും പുനരുദ്ധരിക്കൽ എന്നിവയാണ് ഈ വികസന പദ്ധതിയിലൂടെ പ്രധാനമായും ലക്ഷ്യമിടുന്നത്.
പെരുമ്പടപ്പ് ബ്ലോക്ക് പഞ്ചായത്ത് പ്രസിഡന്റ് റമീന ഇസ്മയിൽ, കെ.എൽ.ഡി.സി ഡെപ്യൂട്ടി പ്രോജക്ട് എൻജിനീയർ ജസ്റ്റിൻ തോമസ്, ഓവർസിയർ ആഷിഖ്, കുമ്മിപ്പാലം കോൾപടവ് സെക്രട്ടറി സുരേഷ് പാട്ടത്തിൽ, പ്രസിഡന്റ് രാഘവൻ തട്ടകത്ത്, പൊന്നാനി കോൾ സംരക്ഷണ സമിതി വൈസ് പ്രസിഡന്റ് സി.കെ. പ്രഭാകരൻ, യു.ഡി.എഫ് പൊന്നാനി നിയോജകമണ്ഡലം കൺവീനർ കല്ലാട്ടേൽ ഷംസു തുടങ്ങിയവരും ഉദ്യോഗസ്ഥർക്കൊപ്പം സന്ദർശനത്തിൽ പങ്കെടുത്തു.
