ഒഫീഷ്യല്‍ എന്‍ട്രിയായ ‘ലാപതാ ലേഡീസ്’ ഓസ്കർ പട്ടികയിൽ നിന്ന് പുറത്ത്

2025-ലെ ഓസ്കർ പുരസ്കാരങ്ങൾക്കുള്ള ചുരുക്കപ്പട്ടികയിൽ നിന്നും ഇന്ത്യയുടെ ഔദ്യോഗിക എൻട്രിയായ ‘ലാപതാ ലേഡീസ്’ പുറത്തായി. ഓസ്കറിൽ ബെസ്റ്റ് ഇന്റർനാഷണൽ ഫീച്ചർ ഫിലിം വിഭാഗത്തിലാണ് ലാപതാ ലേഡീസ് നാമനിർദേശം ചെയ്തിരുന്നത്. ഡിസംബർ 17-നാണ് ചുരുക്കപ്പട്ടിക പ്രഖ്യാപിച്ചത്എന്നാൽ, ഇന്ത്യൻ താരങ്ങൾ അഭിനയിച്ച ‘സന്തോഷ്’ എന്ന സിനിമ ഓസ്കർ ചുരുക്കപ്പട്ടികയിൽ ഇടം നേടിയിട്ടുണ്ട്. ബ്രിട്ടീഷ്-ഇന്ത്യന്‍ സംവിധായകയായ സന്ധ്യ സുരി സംവിധാനംചെയ്ത ചിത്രം യു കെയിൽ നിന്നാണ് ഓസ്കർ ചുരുക്കപ്പട്ടികയിൽ ഇടംപിടിച്ചത്. കഴിഞ്ഞ ദിവസം പുറത്തിറക്കിയ ചുരുക്കപ്പട്ടികയിൽ 2025-ലെ ഓസ്കറിൽ ബെസ്റ്റ് ഇന്റർനാഷണൽ ഫീച്ചർ‌ വിഭാഗത്തിന്റെ അടുത്ത റൗണ്ടിലേക്കായി 15 ചിത്രങ്ങളാണുള്ളത്.കിരൺ റാവു ചിത്രമായ ‘ലാപതാ ലേഡീസ്’ 2025-ലെ ഓസ്കർ ഔദ്യോഗിക എൻട്രിയായി തിരഞ്ഞെടുത്തത് സെപ്റ്റംബറിലാണ്. ചിത്രത്തിന്റെ നിർമാതാവ് നടന്‍ ആമിര്‍ ഖാനാണ്. കഴിഞ്ഞവര്‍ഷം സെപ്റ്റംബറില്‍ ടൊറന്‍റോ ചലച്ചിത്രമേളയിൽ ആദ്യമായി പ്രദര്‍ശിപ്പിച്ച ലാപതാ ലേഡീസ് ഇന്ത്യയിലാകെ ഈ വര്‍ഷം മാര്‍ച്ച് ഒന്നിന് തിയറ്റര്‍ റിലീസിനെത്തിയെങ്കിലും കാര്യമായ സ്വീകാര്യത ലഭിച്ചിരുന്നില്ല. എന്നാല്‍ ഒടിടിയിൽ റിലീസ് ചെയ്തതോടെയാണ് ചിത്രം വലിയ രീതിയിൽ ശ്രദ്ധിക്കപ്പെട്ടത്. പ്രതിഭ റാന്‍ട, സ്പര്‍ഷ് ശ്രീവാസ്തവ, നിതാന്‍ഷി ഗോയല്‍, രവി കിഷന്‍, ഛായ കദം തുടങ്ങിയവരാണ് ചിത്രത്തിലെ മുഖ്യകഥാപാത്രങ്ങൾ.