വാഹനത്തിന് മുകളില്‍ കയറി അഭ്യാസം, പോലീസിനുനേരെ കൈയേറ്റം; കൊച്ചിയില്‍ ഏഴ് യുവാക്കള്‍ കസ്റ്റഡിയില്

കൊച്ചി: പോലീസിനുനേരെ കൈയേറ്റം നടത്തിയ ഏഴുയുവാക്കളെ കസ്റ്റഡിയിലെടുത്തു. മദ്യപിച്ച് വാഹനത്തിന് മുകളിൽ കയറി അഭ്യാസം കാണിച്ചത് ചോദ്യം ചെയ്തതിനാണ് യുവാക്കൾ പോലീസിനെ അക്രമിച്ചത്. സംഭവത്തിൽ ആലപ്പുഴ സ്വദേശികളായ ഏഴ് പേരെയാണ് പനങ്ങാട് പോലീസ് കസ്റ്റഡിയിൽ എടുത്തിരിക്കുന്നത്. ശനിയാഴ്ച വൈകുന്നേരത്തോടെയാണ് സംഭവം. പനങ്ങാട് പോലീസ് സ്റ്റേഷനിൽനിന്ന് അൽപം മാറി ദേശീയ പാതയിലാണ് യുവാക്കൾ മദ്യപിച്ചെത്തി കാറിന് മുകളിൽ കയറി അഭ്യാസം കാണിച്ചത്. സംഭവസമയത്ത് ഈ സ്ഥലത്ത് പോലീസ് ഉണ്ടായിരുന്നു. അവർ യുവാക്കളുടെ ചെയ്തികളെ ചോദ്യംചെയ്തു. പിന്നാലെയാണ് യുവാക്കൾ എസ്.ഐ. ഉൾപ്പെടെയുള്ള പോലീസുകാരെ അക്രമിച്ചത്. തുടർന്ന് പനങ്ങാട് പോലീസ് സ്റ്റേഷനിലും കൺട്രോൾ റൂമിൽ നിന്നടക്കമുള്ള പോലീസുകാർ എത്തിയാണ് യുവാക്കളെ കസ്റ്റഡിയിൽ എടുത്തത്.യുവാക്കൾ എവിടെനിന്നാണ് വന്നത് എന്നതടക്കമുള്ള കാര്യങ്ങൾ പോലീസ് പരിശോധിച്ച് വരികയാണ്. ഇവർ യാത്ര ചെയ്തിരുന്ന കാറിന്റെ പല ഭാഗത്തും പോറലുകൾ ഏറ്റിട്ടുള്ളതായും കണ്ടെത്തിയിട്ടുണ്ട്. ഇവ കഴിഞ്ഞ ദിവസം ഉണ്ടായതാണോ എന്നതടക്കമുള്ള കാര്യങ്ങളും പരിശോധിച്ച് വരികയാണെന്ന് പോലീസ് വ്യക്തമാക്കി.