സിനിമ കാണാനെത്തിയ 13 വയസ്സുകാരിക്ക് നേരെ തീയേറ്ററിൽ വെച്ച് ലൈംഗികാതിക്രമം നടത്തിയ കേസിൽ പ്രതി അറസ്റ്റിൽ. വല്ലപ്പുഴ സ്വദേശി കെ.പി. ജാഫറിനെയാണ് ഷൊർണൂർ പോലീസ് അറസ്റ്റ് ചെയ്തത്. ശനിയാഴ്ച വൈകീട്ടോടെ ഷൊർണൂർ നഗരത്തിലെ തീയേറ്ററിലായിരുന്നു സംഭവം.
കുടുംബത്തോടൊപ്പം തീയേറ്ററിൽ സിനിമ കാണാനെത്തിയതായിരുന്നു പെൺകുട്ടി. തീയേറ്ററിലെത്തിയത് മുതൽ ജാഫർ കുട്ടിയോട് അപമര്യാദയായി പെരുമാറുകയും തുടർച്ചയായി ശല്യപ്പെടുത്തുകയും ചെയ്തിരുന്നു. തുടർന്ന് പെൺകുട്ടിയുടെ സ്വകാര്യഭാഗത്ത് സ്പർശിച്ചതായാണ് പരാതിയിൽ പറയുന്നത്.
കുട്ടി വിവരം ഉടനടി കുടുംബത്തെ അറിയിക്കുകയും തുടർന്ന് ബന്ധുക്കൾ പോലീസിൽ വിവരമറിയിക്കുകയുമായിരുന്നു. പെൺകുട്ടി നൽകിയ മൊഴിയുടെ അടിസ്ഥാനത്തിൽ സ്ഥലത്തെത്തിയ ഷൊർണൂർ പോലീസ് ജാഫറിനെ കസ്റ്റഡിയിലെടുത്തു.പോക്സോ നിയമപ്രകാരം കേസെടുത്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
