എരമംഗലം: എല്ലാം തകർത്തെറിഞ്ഞ സുനാമിയുടെ നടുക്കുന്ന ഓർമകൾ വിദ്യാർഥികളുമായി പങ്കുവെച്ച് പാലപ്പെട്ടിയിലെ മത്സ്യത്തൊഴിലാളികൾ.ലോക സുനാമി ബോധവത്കരണ ദിനത്തോടനുബന്ധിച്ചു പാലപ്പെട്ടി ഗവ. ഹയർ സെക്കൻഡറി സ്കൂൾ സൗഹൃദ ക്ലബിന്റെയും സി.ജി. ആൻഡ് എ.സി. പവർ ബ്രിഗേഡിന്റെയും നേതൃത്വത്തിലാണ് പാലപ്പെട്ടിയിലെ മത്സ്യത്തൊഴിലാളികളുമായും മുതിർന്ന പൗരന്മാരുമായും സംവാദം സംഘടിപ്പിച്ചത്. 2004 -ലെ സുനാമി നൽകിയ നോവുന്ന അനുഭവങ്ങളും തീരദേശ ജനത ഇന്നും നേരിടുന്ന കടലേറ്റ ദുരിതവും വിദ്യാർഥികളുമായി പങ്കുവെച്ചു.
പൊതുവിദ്യാഭ്യാസ വകുപ്പിന് കീഴിലുള്ള കരിയർ ഗൈഡൻസ് ആൻഡ് അഡോളസന്റ് കൗൺസിലിങ് സെല്ലിന്റെ സി.ജി. ആൻഡ് എ.സി. പവർ ബ്രിഗേഡ് യൂണിറ്റ് ജില്ലയിൽ പാലപ്പെട്ടി ഗവ. ഹയർ സെക്കൻഡറി സ്കൂൾ ഉൾപ്പെടെ പത്ത് വിദ്യാലയങ്ങളിൽ പ്രവർത്തിക്കുന്നുണ്ട്. പാഠപുസ്തകങ്ങളിൽനിന്ന് ലഭിക്കുന്ന അറിവിനപ്പുറം സമൂഹത്തിന്റെ നേരിട്ടുള്ള അനുഭവങ്ങളിൽനിന്ന് പഠിക്കാനും ഈ സംവാദം വിദ്യാർഥികൾക്ക് സഹായകമായി. പെരുമ്പടപ്പ് ബ്ലോക്ക്‌ പഞ്ചായത്ത്‌ വികസന സ്ഥിരംസമിതി അധ്യക്ഷൻ ഇ.കെ. ഇസ്മായിൽ, പവർ ബ്രിഗൈഡ് കോർഡിനേറ്റർ സ്റ്റെഫി ഫ്രാൻസിസ്, സ്റ്റുഡന്റ് കോർഡിനേറ്റർ സുഹറ, വിദ്യാർഥികളായ താജുദ്ദീൻ,മൊയ്‌നുദ്ദീൻ,മുഹമ്മദ് തുടങ്ങിയവർ സംവാദത്തിന് നേതൃത്വം നൽകി.
