എടപ്പാൾ:വൈദ്യുതി മേഖലയിലെ പുതിയ നയങ്ങളും ഘടനാപരമായ മാറ്റങ്ങളും ജീവനക്കാരുടെ തൊഴിൽസുരക്ഷയെയും ആനുകൂല്യങ്ങളെയും ബാധിക്കരുതെന്ന് കേരള ഇലക്ട്രിസിറ്റി വർക്കേഴ്സ് ഫെഡറേഷൻ (KEWF-AITUC) പൊന്നാനി ഡിവിഷൻ സമ്മേളനം ആവശ്യപ്പെട്ടു.എടപ്പാൾ സി.കെ. ടവർ ഹാളിൽ നടന്ന സമ്മേളനം സംസ്ഥാന ഓർഗനൈസിങ് സെക്രട്ടറി അരവിന്ദ് കുമാർ ഉദ്ഘാടനം ചെയ്തു. ഡിവിഷൻ പ്രസിഡന്റ് രാജീവ് കെ. അധ്യക്ഷത വഹിച്ചു.ശമ്പള പരിഷ്കരണ കരാർ നടപ്പാക്കുക, ക്ഷാമബത്ത കുടിശ്ശിക അനുവദിക്കുക, സ്ഥാനക്കയറ്റവും നിയമനവും ഉറപ്പാക്കുക, പങ്കാളിത്ത പെൻഷൻ പിൻവലിച്ച് പഴയ പെൻഷൻ പുനഃസ്ഥാപിക്കുക തുടങ്ങിയ ആവശ്യങ്ങളും സമ്മേളനം ഉന്നയിച്ചു.
സ്വകാര്യവൽക്കരണ നീക്കങ്ങൾക്കും ജീവനക്കാരുടെ അവകാശ നിഷേധത്തിനുമെതിരെ ശക്തമായ പ്രക്ഷോഭം നടത്താനും ആഹ്വാനം ചെയ്തു.ടി. ശ്രീകുമാർ,പ്രഭാകരൻ നടുവട്ടം മുഖ്യപ്രഭാഷണം നടത്തി. പുതിയ ഭാരവാഹികളായി രതീഷ് (പ്രസിഡന്റ്), രാജീവ് കെ.സാബിത്ത് (വൈസ് പ്രസിഡന്റുമാർ), സുധീഷ് എൻ. (സെക്രട്ടറി), പ്രദീപ് പി.കെ., രാജേഷ് ടി.ആർ. (ജോയിന്റ് സെക്രട്ടറിമാർ), ശിവദാസൻ (ട്രഷറർ) എന്നിവരെ തിരഞ്ഞെടുത്തു.
