പൊന്നാനി: കെ.പി. നൗഷാദലി എം.എൽ.എയുടെ ചങ്ങരംകുളത്തെ പുതിയ ഓഫീസ് നവംബർ 14-ന് പ്രവർത്തനമാരംഭിക്കും. എടപ്പാൾ റോഡിൽ ഷൈൻ ഓഡിറ്റോറിയത്തിന് എതിർവശത്തായി സജ്ജീകരിച്ചിരിക്കുന്ന ഓഫീസ് രാവിലെ 10-ന് പാണക്കാട് സയ്യിദ് മുനവ്വറലി ശിഹാബ് തങ്ങൾ ഉദ്ഘാടനം ചെയ്യും. ചടങ്ങിൽ രാഷ്ട്രീയ, സാമൂഹിക, സാംസ്കാരിക രംഗത്തെ പ്രമുഖർ സംബന്ധിക്കും.
ഓഫീസ് ഉദ്ഘാടനത്തോടനുബന്ധിച്ച് പ്രത്യേക ദേശീയ സെമിനാറും സംഘടിപ്പിച്ചിട്ടുണ്ട്. ചങ്ങരംകുളം ഗാലക്സി ഓഡിറ്റോറിയത്തിൽ നടക്കുന്ന സെമിനാറിൽ ‘ബുൾഡോസർ രാജ്: വിറങ്ങലിക്കുന്ന മാനവികതയും നിയമവും’ എന്ന വിഷയമാകും ചർച്ച ചെയ്യുക. പ്രമുഖ എഴുത്തുകാരൻ എൻ.എസ്. മാധവൻ, മാധ്യമപ്രവർത്തകരായ അർഫ ഖാനം ഷെർവാണി, വിനോദ് കെ. ജോസ് എന്നിവർ സെമിനാറിൽ പങ്കെടുത്ത് സംസാരിക്കും.
