പൊന്നാനി: മുൻ പ്രധാനമന്ത്രി ഇന്ദിരാഗാന്ധിയുടെ രക്തസാക്ഷിത്വ ദിനവും മുൻ മന്ത്രി എം.പി. ഗംഗാധരന്റെ ചരമദിനാചരണവും പൊന്നാനി മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ വിപുലമായി സംഘടിപ്പിച്ചു. ചന്തപ്പടിയിൽ നടന്ന അനുസ്മരണ ചടങ്ങ് ഡി.സി.സി. ജനറൽ സെക്രട്ടറി ടി.കെ. അഷറഫ് ഉദ്ഘാടനം ചെയ്തു. മണ്ഡലം പ്രസിഡന്റ് കെ. ജയപ്രകാശ് ചടങ്ങിൽ അധ്യക്ഷത വഹിച്ചു.
രാജ്യത്തിന്റെ അഖണ്ഡതയ്ക്കും ഐക്യത്തിനും വേണ്ടി സ്വന്തം ജീവൻ ബലിനൽകിയ, സമാനതകളില്ലാത്ത ലോക നേതാവായിരുന്നു ഇന്ദിരാഗാന്ധിയെന്ന് ടി.കെ. അഷറഫ് അനുസ്മരിച്ചു. ഭാരതത്തിന്റെ ഒരുമ നിലനിർത്താൻ അവർ കൈക്കൊണ്ട ധീരമായ തീരുമാനങ്ങളും അതിനായി നടത്തിയ ജീവത്യാഗവും ഇന്ത്യൻ ചരിത്രത്തിലെ സുപ്രധാന അധ്യായമാണെന്നും അദ്ദേഹം കൂട്ടിച്ചേർത്തു. പൊന്നാനിയുടെ വികസനങ്ങൾക്ക് തുടക്കം കുറിച്ച വികസന നായകനായിരുന്നു എം.പി. ഗംഗാധരനെന്നും ചടങ്ങിൽ നേതാക്കൾ അനുസ്മരിച്ചു.
ചടങ്ങിൽ അഡ്വ. കെ.പി. അബ്ദുൾ ജബ്ബാർ, എം. അബ്ദുൾ ലത്തീഫ്, ഉണ്ണികൃഷ്ണൻ പൊന്നാനി, ടി.വി. ബാവ, പി.സി. ഇബ്രാഹിം കുട്ടി (കോയ), ജലീൽ പള്ളിത്താഴത്ത്, കെ. മുരളിധരൻ, എം.എ. നസീം, ടി.വി. അരവിന്ദൻ, കെ. കേശവൻ, കെ. വസുന്ധരൻ, കെ. മുഹമ്മദ് തുടങ്ങിയവർ സംസാരിച്ചു.
