ചങ്ങരംകുളം:ലെസ്സൺ ലെൻസ് ഇന്റഗ്രേറ്റഡ് ക്യാമ്പസിന്റെ ആഭിമുഖ്യത്തിൽ ദേശീയ-അന്തർദേശീയ തലങ്ങളിൽ ശ്രദ്ധേയ നേട്ടങ്ങൾ കൈവരിച്ച വിദ്യാർത്ഥികളെ ആദരിക്കുന്ന വിപുലമായ അനുമോദന സമ്മേളനം ജൂലൈ 31-ന് വെള്ളിയാഴ്ച രാവിലെ 10 മണിക്ക് ചങ്ങരംകുളം ഗാലക്സി ഓഡിറ്റോറിയത്തിൽ നടക്കുമെന്ന് ലെസ്സൺ ഭാരവാഹികള് വാര്ത്താസമ്മേളനത്തില് അറിയിച്ചു.ദേശീയ മെഡിക്കൽ പ്രവേശന പരീക്ഷയായ NEET-ൽ 660 മാർക്ക് നേടി രാജ്യത്തെ പ്രമുഖ മെഡിക്കൽ കോളേജിൽ പ്രവേശനം ഉറപ്പിച്ച ഭാനവ് എൻ. എസ്. നെ ചടങ്ങില് വച്ച് അനുമോദിക്കും.പത്താം ക്ലാസ് മുതൽ ലെസ്സൺ ലെൻസ് ഇന്റഗ്രേറ്റഡ് ക്യാമ്പസിലെ വിദ്യാർത്ഥിയായ ഭാനവ് വിവിധ ദേശീയ-അന്തർദേശീയ ഒളിമ്പ്യാഡുകളിൽ ശ്രദ്ധേയ വിജയങ്ങൾ നേടിയിട്ടുണ്ട്.അക്കാദമിക മികവിനുള്ള ‘ഉജ്ജ്വല പ്രതിഭ’ പുരസ്കാരവും ഭാനവിനെ തേടിയെത്തിയിട്ടുണ്ട്.കഴിഞ്ഞ പ്ലസ് വൺ പൊതുപരീക്ഷയിൽ മികച്ച വിജയം നേടിയ വിദ്യാർത്ഥികളെയും ചടങ്ങിൽ ആദരിക്കും.
CUET പരീക്ഷയിലൂടെ ഡൽഹി സർവകലാശാലയിൽ പ്രവേശനം നേടിയ മുഹമ്മദ് സിയാനെയും,അന്തർദേശീയ ഒളിമ്പ്യാഡുകളിൽ ശ്രദ്ധേയ നേട്ടങ്ങൾ കൈവരിച്ച പ്രണവ് എൻ. എസ്.,ജഹഫിൽ എന്നിവരെയും പ്രത്യേകം അനുമോദിക്കും.2026–27 അധ്യയന വർഷത്തെ വിദ്യാർത്ഥി യൂണിയൻ ഭാരവാഹികളുടെ സ്ഥാനാരോഹന ചടങ്ങും ഇതോടനുബന്ധിച്ച് നടക്കും.പൊന്നാനി എം.എൽ.എ.ഉൾപ്പെടെ വിദ്യാഭ്യാസ,സാമൂഹിക, സാംസ്കാരിക രംഗങ്ങളിലെ പ്രമുഖർ ചടങ്ങിൽ പങ്കെടുക്കും.വിദ്യാർത്ഥികളുടെ അക്കാദമിക മികവും സമഗ്ര വ്യക്തിത്വവികസനവും സമൂഹത്തിന് മുന്നിൽ ആദരിക്കുകയും,പുതിയ തലമുറയ്ക്ക് പ്രചോദനമാകുന്ന മാതൃകകളെ ഉയർത്തിക്കാട്ടുകയും ചെയ്യുക എന്ന ലക്ഷ്യത്തോടെയാണ് അനുമോദന സമ്മേളനം സംഘടിപ്പിക്കുന്നതെന്ന് സംഘാടകർ അറിയിച്ചു.ചെയർമാൻ ഷാനവാസ് വട്ടത്തൂർ,അക്കാഡെമിക് ഡയറക്ടർ യഹ്യ പി ആമയം,എക്സിക്യൂട്ടീവ് ഡയറക്ടർമാരായ മുംതസർ മുഹമ്മദ്,നിഷാദ് കാഞ്ഞിയൂർ,ഹെഡ് ഓഫ് ദി ഡിപ്പാർട്മെന്റ് നവാസ് ഹുദവി തുടങ്ങിയവര് വാര്ത്താസമ്മേളനത്തില് പങ്കെടുത്തു
