എടപ്പാൾ: ആധാർ വെരിഫിക്കേഷന്റെ പേര് പറഞ്ഞ് തയ്യൽ തൊഴിലാളികൾക്ക് നിഷേധിച്ച പെൻഷൻ ഉടൻ പുനസ്ഥാപിക്കണമെന്ന് ആൾ കേരള ടൈലേഴ്‌സ് അസോസിയേഷൻ (എ കെ റ്റി എ) എടപ്പാൾ ഏരിയ കമ്മിറ്റി ആവശ്യപ്പെട്ടു. നടുവട്ടത്ത് ചേർന്ന ഏരിയ കമ്മിറ്റി യോഗം ജില്ലാ സെക്രട്ടറി പി.ഡി. സണ്ണി ഉദ്ഘാടനം ചെയ്തു. ഏരിയ പ്രസിഡന്റ് എം.വി. നാസർ ചടങ്ങിൽ അധ്യക്ഷത വഹിച്ചു.
തയ്യൽ തൊഴിലാളി ക്ഷേമനിധിയിൽ കൃത്യമായി പണമടച്ച തൊഴിലാളികളുടെ റിട്ടയർമെന്റ് ആനുകൂല്യങ്ങൾ 2026 ഫെബ്രുവരിക്ക് ശേഷം ഗണ്യമായി വെട്ടികുറച്ച സർക്കാർ നടപടി അടിയന്തരമായി പുനഃപരിശോധിക്കണമെന്നും യോഗം ആവശ്യപ്പെട്ടു.
തയ്യൽ തൊഴിലാളികളോട് സർക്കാർ കാണിക്കുന്ന അവഗണനക്കെതിരെ എ കെ റ്റി എ മലപ്പുറം ജില്ലാ കമ്മിറ്റിയുടെ നേതൃത്വത്തിൽ നവംബർ 5-ന് മലപ്പുറം ക്ഷേമനിധി ഓഫീസിലേക്ക് നടത്തുന്ന മാർച്ച് വൻ വിജയമാക്കാൻ യോഗം തീരുമാനിച്ചു.യോഗത്തിൽ ജില്ലാ പ്രസിഡന്റ് പി. രാമകൃഷ്ണൻ, ഏരിയ സെക്രട്ടറി കെ.കെ. കമ്മുണ്ണി, ജില്ലാ വൈസ് പ്രസിഡന്റ് സി.വി. ചന്ദ്രിക, ഏരിയ ട്രഷറർ സി.വി. ബിന്ദു, റീന, കെ.പി. രാജി, കെ.ടി. പത്മജ, മോഹൻദാസ്, അസൂറ, കെ.പി. അശോകൻ, മണി, വി.പി. അബ്ദുൽ ഖാദർ തുടങ്ങിയവർ സംസാരിച്ചു.
