ചാലിശേരി : ആലിക്കര സ്വദേശി ആയ മുഹമ്മദ് ശരീഫ് എഴുതിയ ‘ആലിക്കര മുതൽ ആഫ്രിക്കവരെ’ എന്ന പുസ്തകത്തിന്റെ പ്രകാശനം സംഘടിപ്പിച്ചു.ബുധനാഴ്ച വൈകിയിട്ട് കോഴിക്കോട് കെ .പി .കേശവമേനോൻ ഹാളിൽ നടന്ന പരിപാടിയിൽ ഇന്ത്യൻ ഫുട്ബോൾ താരം സി.കെ. വിനീത് പുസ്തക പ്രകാശനം നിർവഹിച്ചു.
“കാഴ്ചകൾക്കപ്പുറം മനസ്സുകൊണ്ട് വായനക്കാരിലേക്കിറങ്ങിച്ചെന്ന് പുതിയ അനുഭവങ്ങളും കാഴ്ചപ്പാടുകളും പരിചയപ്പെടുത്തുന്ന അസാമാന്യ രചനകളാണ് ‘ആലിക്കര മുതൽ ആഫ്രിക്കവരെ’ എന്ന പുസ്തകം തുറന്നുകാട്ടുന്നതെന്ന്” നടനും സംവിധായകനുമായ മധു പാൽ പറഞ്ഞു.എഴുത്തുകാർ പുതിയ കാഴ്ചകൾ വായനക്കാർക്ക് മുന്നിൽ അവതരിപ്പിക്കാനാണ് ശ്രമിക്കേണ്ടതെന്നും, മുൻപേ നടന്നവരുടെ വഴിയിലൂടെ സഞ്ചരിച്ച് അതിനപ്പുറമുള്ള ലോകം വായനക്കാർക്ക് കാണിച്ചുതരുന്ന ശ്രമകരമായ ദൗത്യത്തിൽ എഴുത്തുകാരൻ മുഹമ്മദ് ശരീഫ് വിജയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
ചടങ്ങിൽ എഴുത്തുകാരായ രമ്യ എസ്. ആനന്ദ്, അർഷാദ് ബത്തേരി, വന്യജീവി ഫോട്ടോഗ്രാഫറും എഴുത്തുകാരനുമായ എൻ.എ. നസീർ, മാതൃഭൂമി അസിസ്റ്റന്റ് എഡിറ്റർ കെ. വിശ്വനാഥ്, മാതൃഭൂമി ചീഫ് സബ് എഡിറ്റർ ശ്രീകാന്ത് കോട്ടയ്ക്കൽ എന്നിവർ സംസാരിച്ചു. എഴുത്തുകാരൻ മുഹമ്മദ് ശരീഫ് മറുപടി പ്രസംഗം നടത്തി..
