ചങ്ങരംകുളം :ലോക പരിസ്ഥിതി ദിനത്തിൽ വേറിട്ടൊരു മാതൃകയുമായി അസ്സബാഹ് ആർട്സ് ആൻഡ് സയൻസ് കോളേജിലെ വിദ്യാർത്ഥികൾ.വളയംകുളം ഗവൺമെൻ്റ് റെസ്റ്റ് ഹൗസിന് മുൻവശത്ത് കാട്ടുചെടികളും പുല്ലും കയറി പൊന്തപിടിച്ചു കിടന്നിരുന്ന ഭാഗം ശുചീകരിച്ച് മനോഹരമായ പൂന്തോട്ടമാക്കി മാറ്റുന്ന ‘ഗ്രീൻ ഒയാസിസ് പ്രോജക്റ്റിന്റെ ആദ്യഘട്ടം പൂർത്തീകരിച്ചു.
അസ്സബാഹ് കോളേജ് എൻ.എസ്.എസ് ,നേച്ചർ ക്ലബ് എന്നിവയുടെ സംയുക്ത ആഭിമുഖ്യത്തിലാണ് ശുചീകരണ -സൗന്ദര്യവൽക്കരണ പ്രവർത്തനങ്ങൾ സംഘടിപ്പിച്ചത്.പരിസ്ഥിതി ദിനത്തിൽ രാവിലെ പത്ത് മണിക്ക് റെസ്റ്റ് ഹൗസ് പരിസരത്ത് നടന്ന പരിപാടി പന്ത്രണ്ടാം വാർഡ് മെമ്പർ ഫസീല ഉത്ഘാടനം ചെയ്തു.എൻ.എസ്.എസ് പ്രോഗ്രാം ഓഫീസർ അബ്ദുൽ റഹ്മാൻ. പി, നേച്ചർ ക്ലബ് കോർഡിനേറ്റർ ആസിഫ് ജിപ്സി,സ്റ്റുഡന്റസ് കോർഡിനേറ്റർ ശരത്ത്. ടി. വി എന്നിവർ പരിപാടിക്ക് നേതൃത്വം നൽകി.
ദീർഘനാളായി ആവശ്യമില്ലാത്ത ചെടികളും പുല്ലും വളർന്നു പന്തലിച്ചു കിടന്നിരുന്ന ഭാഗത്തെ കാടുകൾ വെട്ടിത്തെളിക്കുകയും, അവിടെ അടിഞ്ഞുകൂടിയിരുന്ന പ്ലാസ്റ്റിക് അവശിഷ്ടങ്ങൾ പൂർണ്ണമായും എടുത്തുമാറ്റുകയും ചെയ്തു. തുടർന്ന് മണ്ണ് ഒരുക്കിയ ശേഷമാണ് വിദ്യാർത്ഥികൾ അവിടെ വിവിധതരം മനോഹരമായ പൂച്ചെടികൾ നട്ടുപിടിപ്പിച്ചത്.
പൊതുസ്ഥലങ്ങൾ കാടുപിടിക്കാതെയും മാലിന്യമുക്തമായും സൂക്ഷിക്കാൻ എല്ലാവരും തയ്യാറാകണമെന്ന സന്ദേശമാണ് ഈ കൂട്ടായ്മ സമൂഹത്തിന് നൽകുന്നത് എന്ന് ഉൽഘാടക അഭിപ്രായപെട്ടു.നാടിൻ്റെ പരിസ്ഥിതി സംരക്ഷണത്തിനും ശുചിത്വത്തിനും യുവജനതയുടെ പങ്കാളിത്തം എത്രത്തോളം അത്യാവശ്യമാണെന്ന് തെളിയിക്കുന്നതായിരുന്നു അസ്സബാഹ് കോളേജിലെ എൻ.എസ്.എസ്, നേച്ചർ ക്ലബ് പ്രവർത്തകരുടെ ഈ വേറിട്ട പരിസ്ഥിതി ദിനാചരണം.
