പട്ടാമ്പിയിലെ ഒരു സ്വകാര്യ ലോഡ്ജിൽ തൃത്താല സ്വദേശിയായ യുവാവിനെ മരിച്ച നിലയിൽ കണ്ടെത്തി. തൃത്താല തണ്ണീർക്കോട് തട്ടത്താഴത്ത് വീട്ടിൽ മുഹമ്മദിന്റെ മകൻ സജീറിനെയാണ് (39) മരിച്ച നിലയിൽ കണ്ടെത്തിയത്. ഞായറാഴ്ച രാത്രിയോടെയായിരുന്നു സംഭവം. കഴിഞ്ഞ മൂന്ന് ദിവസമായി പട്ടാമ്പി പള്ളിപ്പുറം റോഡിലുള്ള ഒരു ലോഡ്ജിൽ സജീർ താമസിച്ചു വരികയായിരുന്നു.
കഴിഞ്ഞ ദിവസം രാത്രി ലോഡ്ജ് ഉടമ സജീറിനെ അന്വേഷിച്ച് മുറിയിൽ എത്തിയെങ്കിലും വാതിൽ തുറന്നില്ല. തുടർന്ന് ജനലിലൂടെ നോക്കിയപ്പോഴാണ് സജീറിനെ രക്തം വാർന്ന നിലയിൽ കണ്ടത്. ഉടൻ തന്നെ പോലീസിൽ വിവരം അറിയിക്കുകയായിരുന്നു. പോലീസ് സ്ഥലത്തെത്തി നടത്തിയ പരിശോധനയിലാണ് മരണം സ്ഥിരീകരിച്ചത്.
മൃതദേഹം പട്ടാമ്പി താലൂക്ക് ആശുപത്രിയിലേക്ക് മാറ്റി. പിന്നീട് പോസ്റ്റ്മോർട്ടത്തിനായി തൃശൂർ മെഡിക്കൽ കോളേജിലേക്ക് കൊണ്ടുപോയിട്ടുണ്ട്. മരണവുമായി ബന്ധപ്പെട്ട കൂടുതൽ വിവരങ്ങൾക്കായി പോലീസ് അന്വേഷണം തുടരുകയാണ്.
