സുരക്ഷാ ബോധവൽക്കരണത്തിനായി കുട്ടി പോലീസ് പൊന്നാനി ഫയർ സ്റ്റേഷൻ സന്ദർശിച്ചു

തവനൂർ: സുരക്ഷാ പാഠങ്ങൾക്കും അടിയന്തര സാഹചര്യങ്ങളിൽ കൈകാര്യം ചെയ്യേണ്ട നടപടികൾക്കുമായി തവനൂർ കേളപ്പൻ മെമ്മോറിയൽ ഹയർ സെക്കൻഡറി സ്കൂളിലെ സീനിയർ എസ്.പി.സി കേഡറ്റുകൾ പൊന്നാനി ഫയർ സ്റ്റേഷൻ സന്ദർശിച്ചു. തിങ്കളാഴ്ച നടന്ന സന്ദർശനത്തിൽ അഗ്നിബാധ നിയന്ത്രണം, രക്ഷാപ്രവർത്തന രീതികൾ, ഫയർഫോഴ്‌സ് ഉപകരണങ്ങളുടെ പ്രവർത്തനം തുടങ്ങിയ വിഷയങ്ങളിൽ വിദ്യാർത്ഥികൾക്ക് പരിശീലനം നൽകി.
പൊന്നാനി ഫയർ സ്റ്റേഷനിലെ ഫയർമാൻമാരായ വിനയശീലൻ, വിവേക്, സാബു എന്നിവർ ക്ലാസുകൾ നയിച്ചു. അടിയന്തര സാഹചര്യങ്ങളിൽ പൗരന്മാർ സ്വീകരിക്കേണ്ട മുൻകരുതലുകളും സുരക്ഷാ മാർഗങ്ങളും വിശദീകരിച്ചു. കമ്മ്യൂണിറ്റി പോലീസ് ഓഫീസർമാരായ ജാഫർ ലിബിറ്റ് എന്നിവർ പരിപാടിയിൽ സംബന്ധിച്ച് വിദ്യാർത്ഥികളെ പ്രോത്സാഹിപ്പിച്ചു.
സുരക്ഷാ ബോധവൽക്കരണ പ്രവർത്തനങ്ങളുടെ ഭാഗമായി സംഘടിപ്പിച്ച ഈ സന്ദർശനം വിദ്യാർത്ഥികൾക്ക് പ്രായോഗിക അറിവ് നേടുന്നതിന് സഹായകമായി.