ചങ്ങരംകുളം :
പണ്ഡിത പ്രമുഖനും പന്താവൂർ ഇർശാദ് സ്ഥാപനങ്ങളുടെ ചെയർമാനുമായിരുന്ന എം വി ഉമർ മുസ്ലിയാരുടെ സ്മരണാർത്ഥം സാമൂഹിക പ്രതിബദ്ധതയുള്ള പണ്ഡിതനും പ്രതിഭാത്വമുള്ള വിദ്യാർത്ഥിക്കും പ്രതിവർഷം നൽകിവരുന്ന അവാർഡ് ,
പ്രഗൽഭ പണ്ഡിതൻ എരമംഗലം ടി എം സഈദ് മുസ്ലിയാർക്കും ഇർശാദ് ഇംഗ്ലീഷ് സ്കൂൾ എട്ടാം ക്ലാസ് വിദ്യാർത്ഥി ഷാൻ അഹമ്മദിനും നൽകാൻ ഇർശാദ് കേന്ദ്രകമ്മിറ്റി യോഗം തീരുമാനിച്ചു
1976 മുതൽ യു എ ഇ മതകാര്യ വകുപ്പിന് കീഴിൽ അബുദാബിയിൽ ഇമാം , ഖത്വീബ് തുടങ്ങിയ പദവികൾ വഹിച്ചിരുന്ന സഈദ് മുസ്ലിയാർ , പ്രവാസി മലയാളികളുടെ പ്രശ്നങ്ങളിൽ സജീവമായി ഇടപെട്ടിരുന്നു; നിരവധി തവണ ഹജ്ജ് , ഉംറ സംഘങ്ങളെ നയിച്ചു . സ്വദേശത്തും പ്രബോധന മേഖലയിൽ സക്രിയ സാന്നിധ്യമായിരുന്ന അദ്ദേഹം ഇപ്പോൾ വിശ്രമ ജീവിതത്തിലാണ്.
കുഴിങ്ങര ,വെന്മേനാട് , എടപ്പാൾ ജുമാമസ്ജിദുകളിലായിരുന്നു സേവനം. ശംസുൽ ഉലമ ഇ.കെ. അബൂബക്കർ മുസ്ലിയാരായിരുന്നു പ്രധാന ഗുരു .കാന്തപുരം എ പി അബൂബക്കർ മുസ്ലിയാർ ഉൾപ്പെടെ പ്രഗൽഭ പണ്ഡിതരുമായി അടുത്ത ബന്ധം പുലർത്തി ,
എരമംഗലം ഇട്ടിലകാട്ടയിൽ കോയക്കുട്ടി – ഫാഥിമ ദമ്പതികളുടെ മകനായി 1943 ജൂലൈ ഒന്നിനാണ് ജനനം.
വിദ്യാർഥി വിഭാഗത്തിൽ നിന്നും അവാർഡിനു പരിഗണിച്ച ശാൻ അഹമദ് ,തികഞ്ഞ അച്ചടക്കവും മികച്ച പഠന വിജയവും സ്ഥിരോത്സാഹവും കൈമുതലാക്കി രചനാ വൈഭവം , ഡിസൈനിംഗ് , മാപ്പിള കലകളിലെ പ്രകടനങ്ങൾ , ഫുട്ബോൾ ,ഖുർആൻ പാരായണ പ്രാവീണ്യം എന്നിവയിലെല്ലാം ഏറെ നേട്ടങ്ങൾ കരസ്ഥമാക്കിയിട്ടുണ്ട്.
ജില്ലാ സംസ്ഥാന തല മത്സരങ്ങളിൽ തിളങ്ങുന്ന താരമായി ഇർശാദിന്റെ യശസ്സുയർത്തുന്ന ഷാൻ അഹമദ് എടപ്പാൾ കോലത്ത് പനേങ്ങലവളപ്പിൽ ശംസുദ്ദീൻ – സാജിത ദമ്പതികളുടെ മകനാണ്.
