തൃശൂരിൽ വീണ്ടും വൺവേ പരീക്ഷണം നഗരത്തിലെ തിക്കും തിരക്കും കുറയ്ക്കാനായി ട്രാഫിക് റെഗുലേറ്ററി കമ്മിറ്റിയുടെ പുതിയ നീക്കം.

തൃശ്ശൂർ : നാളെമുതല്‍ ചെട്ടിയങ്ങാടി മുതല്‍ എംഒ റോഡ് വരെയുള്ള പോസ്റ്റ് ഓഫീസ് റോഡിലും സാഹിത്യ അക്കാദമി റോഡിലും വണ്‍വേ സിസ്റ്റം പ്രാബല്യത്തില്‍ വരുമെന്നു സിറ്റി ട്രാഫിക് എൻഫോഴ്സ്മെന്‍റ് യൂണിറ്റ് സ്റ്റേഷൻ ഹൗസ് ഓഫീസർ അറിയിച്ചു. ഇടുങ്ങിയ റോഡും വാഹനങ്ങളുടെ പെരുപ്പവുംമൂലം ബുദ്ധിമുട്ടിലാകുന്ന യാത്രികർക്കു സുഗമമായ ഗതാഗതത്തിനു വഴിയൊരുക്കുക എന്നതാണ് ലക്ഷ്യം. പോസ്റ്റ് ഓഫിസ് റോഡില്‍ എംഒ റോഡില്‍നിന്ന് വാഹനങ്ങള്‍ക്കു ചെട്ടിയങ്ങാടിയിലേക്ക് പോകാം. എന്നാല്‍ ചെട്ടിയങ്ങാടിയില്‍നിന്ന് എംഒ റോഡിലേക്കു വാഹനങ്ങള്‍ക്കു പ്രവേശനം ഉണ്ടായിരിക്കുന്നതല്ല. പോസ്റ്റ് ഓഫീസ് റോഡില്‍ ഫ്രൂട്സ് കച്ചവടം നടത്തുന്നവർ വാഹനങ്ങള്‍ ഒരു വരിയായി നിർത്തി രാവിലെ ഒന്പതിനുമുന്പ് കയറ്റിറക്കുകള്‍ നടത്തണം. സാഹിത്യ അക്കാദമി റോഡില്‍ സാഹിത്യ അക്കാദമി ജംഗ്ഷനില്‍നിന്നു ഫൈൻ ആർട്സ് കോളജ് ജംഗ്ഷനിലേക്കു വാഹനങ്ങള്‍ക്കു പ്രവേശനം അനുവദിച്ചിട്ടുണ്ടെങ്കിലും ഫൈൻ ആർട്സ് കോളജ് ജംഗ്ഷനില്‍നിന്നു സാഹിത്യ അക്കാദമി ജംഗ്ഷനിലേക്കു പ്രവേശനം ഉണ്ടായിരിക്കില്ല. വണ്‍വേ നിയമം തെറ്റിക്കുന്നവർക്കെതിരേ കർശനനടപടികള്‍ സ്വീകരിക്കുമെന്നു സ്റ്റേഷൻ ഹൗസ് ഓഫീസർ അറിയിച്ചു