വളാഞ്ചേരി പൈങ്കണ്ണൂരിൽ കാണാതായ യുവാവിനെ കുളത്തില്‍ മരിച്ച നിലയില്‍ കണ്ടെത്തി

വളാഞ്ചേരി പൈങ്കണ്ണൂരിൽ കാണാതായ യുവാവിനെ കുളത്തിൽ മരിച്ച നിലയിൽ കണ്ടെത്തി. എടയൂർ പൂക്കാട്ടിരി സ്വദേശി ശ്രീനിവാസിന്റെ മകൻ 21 വയസുള്ള പ്രണവിന്റെ മൃതദേഹമാണ് കുളത്തിൽ കണ്ടെത്തിയത്.പ്രണവിനെ കാണാനില്ലെന്ന് കാണിച്ച് ബന്ധുക്കൾ നേരത്തെ പൊലീസിൽ പരാതി നൽകിയിരുന്നു.പരാതിയുടെ അടിസ്ഥാനത്തിൽ പോലീസ് അന്വേഷണം തുടരുന്നതിനിടെയാണ് കുളത്തില്‍ മൃതദേഹം കണ്ടെത്തിയത്.കഴിഞ്ഞ ദിവസം വീടിൻ്റെ അടുത്തു നിന്ന് കിലോമീറ്റർ അകലെയായി പ്രണവിന്റെ ബൈക്കും മൊബൈൽ ഫോണും പോലീസ് കണ്ടെത്തിയിരുന്നു.തുടർന്ന് വളാഞ്ചേരി പൊലീസും ഫയർഫോഴ്സും നാട്ടുകാരും ചേര്‍ന്ന് സമീപത്തെ പാടത്തും തോട്ടിലും പരിശോധന നടത്തിയിരുന്നു.എന്നാൽ പ്രണവിനെ കണ്ടെത്താൻ കഴിഞ്ഞിരുന്നില്ല.വ്യാഴാഴ്ച കാലത്ത് മാരാതെ പീടിക കുളത്തിന് സമീപം ചെരുപ്പ് കണ്ട നാട്ടുകാർ കുളത്തിൽ നടത്തിയ പരിശോധനയിലാണ് മൃതദേഹം കണ്ടെത്തിയത്.നടപടിക്രമങ്ങള്‍ പൂര്‍ത്തായാക്കി പോസ്റ്റുമോര്‍ട്ടത്തിന് ശേഷം മൃതദേഹം ബന്ധുക്കൾക്ക് വിട്ടു നൽകും.