ജപ്തിക്ക് പിന്നാലെ വയോധികയുടുടെ മരണം’സ്റ്റേറ്റ് ബാങ്ക് ഓഫ് ഇന്ത്യ പാലപ്പെട്ടി ബ്രാഞ്ച് ഉപരോധിച്ച് യൂത്ത് കോണ്‍ഗ്രസ്

പെരുമ്പടപ്പ്:പാലപെട്ടി പുതിയിരുത്തിയിൽ വയോധികയെ വീടൊഴിപ്പിച്ച് ജപ്തി നടത്തിയ സ്റ്റേറ്റ് ബാങ്ക് ഓഫ് ഇന്ത്യ യുടെ നടപടിയെ തുടർന്ന് വയോധികയായ മാമി(82) ഹൃദയംപൊട്ടി മരണമടഞ്ഞ സംഭവത്തിൽ യൂത്ത് കോൺഗ്രസ്‌ പാലപ്പെട്ടി ബ്രാഞ്ച് എസ് ബി ഐ ശാഖ ഉപരോധിച്ചു.രാവിലെ 9.30 ന് ഉപരോധം ആരംഭിച്ചത്തോടെ ബാങ്ക് പൂർണമായി തുറക്കാനാവാതെ പ്രവർത്തനം തടസ്സപെട്ടു.ഇതോടെ പോലിസ് സമരക്കാരെ അറസ്റ്റ് ചെയ്തു നീക്കി. അസുഖബാധിതയായ വയോധികയെ കുടിയിറക്കി ജപ്തി ചെയ്ത ബാങ്കിന്റെ നടപടി കാടത്തമാണെന്നും കോടികൾ ലോൺ കുടിശിക യാക്കിയ വിജയ് മല്ലിയെ പോലെയുള്ള വൻകിട മുതലാളിമാരെ രക്ഷിക്കുകയും സാദാരണക്കാരോട് മനുഷ്യത്വരഹിതമായും പെരുമാറുന്ന ബാങ്കിന്റെ നടപടികൾ അംഗീകരിച്ചു നൽകാൻ സാധിക്കില്ലന്നും യൂത്ത് കോൺഗ്രസ്‌ പ്രതികരിച്ചു. യൂത്ത് കോൺഗ്രസ്‌ ജില്ലാ സെക്രട്ടറി റാസിൽ, നിയോജകമണ്ഡലം പ്രസിഡന്റ്‌ അഡ്വ. കെ.വി സുജീർ, കെ.എസ്.യു ജില്ലാ സെക്രട്ടറി റാഷിദ്‌ പുതുപൊന്നാനി, യൂത്ത് കോൺഗ്രസ്‌ നേതാക്കളായ അൻസാർ മനാഫ്, ഹർഷാദ്, ശാക്കിർ, അനു തുടങ്ങിയവർ ഉപരോധത്തിന് നേതൃത്വം നൽകി.